TURA: Ia 2026 bilsini Secondary School Leaving Certificate (SSLC) porikkao, Top 20-o biapko man·e chu·sokanggipa chatro chatrirangoni bang·batan, an·tangtangni chu·sokgipa ong·anina, Nokgipa Isol, ma·a paa aro skulni skigiparangko mittelpilangtokaha.
Ia bilsini SSLC porikkao Embee Rosebud Higher Secondary School-ni chatro Vishal Kumar, Top 20-ni gnigipa biapo chu·sokna man·aha aro ia chatroara, kni rate cha·gipa (napit)-ni depantesa ong·genchimoba, tikkele poraianichi nambegipa result-ko man·e chu·sokgipa ong·na man·aha.
An·tangni chu·sokgipa ong·ani bidingo kobor ra·timgipa manderang baksa agangrikengon, ia chu·sokanina ua dingtangmancha an·tangni ma·a paako aro skigiparangko mittelpilangaha.
Porikkana tarisamsoaniko talatangengon, a·bachengode ua inditana gisik nangbrejachim indiba ja·mano ua somoiko done poraina a·bachengaha ine Vishal aganaha. Ua salo kontagni ba kontagittam dakesan porairongaia indiba poraimitingo ua gisiko nange porairongskaaha ineba Vishal aganaha.
Mikkangchi maiko dakna miksongenga ine sing·on, ua Kendriya Vidyalaya-o ba Don Bosco College-o Science-ko ra·e poraina miksongenga ine Vishal parakataha.
An·tangni chadambeskarangna ku·pattianirangko on·china aganon, social media-rango an·tangtangni somoirango agre bon·atjachina aro poraimiting somoirango pangnan ki·tapo gisik on·china Vishal didiataha.
Ia bilsini SSLC porikkao Top 20-ni gittamgipa biapo chu·sokanggipa Pechon A Sangma Memorial Police Public Secondary School-ni Prinita Das-ba an·tangni chu·sokgipa ong·anina skigiparangko aro ma·a paako mittelpilangaha.
Mikkangchi ua Science-ko ra·e ja·mano doctor-na poraianggen ineba Prinita aganaha.
Je gita konta poraigenchimoba pangnan gisiko nange poraigenchimode chu·sokaniko man·a amaia ineba ua, an·tangni chadambeskarangko gisiko nange poraichina didiataha.
Ia bilsini SSLC porikkao A·chik chadamberangoniba adita sak Top 20-o biapko man·rikpaaha aro uamangoni, 19-gipa biapko man·e pass ka·gipa Sherwood School-ni Adiel Sangma-ba saksa ong·paa.
Adiel Sangma, saksa skigipani depante ong·e, pangnan poraina gita somoiko on·ronga aro ia porikkao chu·sokgipa ong·anina ua kusi ong·genchimoba, bang·gija mark-rangko man·dapgenchimode kusi ong·batgenchim ine aganaha.
SSLC porikkana ua somoiko done poraisamsoaha aro mitam subject-rangnade ua bakrobate somoiko on·ahani gimin nambate ma·sina man·aha ineba Adiel aganaha.
An·tangni chu·sokgipa ong·anina Adiel, an·tangni Maths/Science skigipa, gipin skigiparang aro an·tangni ma·a paarangkoba mittelpilangaha.
Da·o ua Chennai-ona re·ange Science-ko poraina miksongenga ineba Adiel parakataha.
Top 20-ni 20-gipa biapo Sherwood School-ni Churchill Leithamthem, pass ka·angskaaha aro ua Home Science College-o skigipani depante ong·a.
An·tangni chu·sokgipa ong·anina Churchill-ba, an·tangni ma·a paa aro skigiparang, mongsongbate Maths aro Science skigipako mittelpilangaha.
Mikkangchi ua NERIST-na tarisogen aro uni ja·man engineer-ni kamna jotton ka·gen ineba Churchill aganaha.
