SSLC porikkao pass ka·giparang tang·dopretanina GHRCRF jajrengchaka

TURA: Ia 2026 bilsini Secondary School Leaving Certificate (SSLC) porikkani result-rangko parakanio, a·dok gimikni pass ka·ani percentage 93.30 percent ong·ahani gimin Garo Hills Research Center and Records Foundation (GHRCRF) jajrengachakaniko parakatenba, porikka ra·ani bewalrangko aro mark on·anirangko name nipiltaichina Directorate of School Education & Literacy (DSEL)-ni Director-na sedoataha.
GHRCRF-ni DSEL-na sedoatani gitade, ia bilsini SSLC porikkao pass ka·giparang, 93.30 percent ong·e, batanggimin bilsirangona bate rang·san tang·doaniko nikna man·aha aro ian skulrango skie on·ani aro chatro chatrirangni seanirangko nipilanio jajrengchakaniko ong·ataha.
“SSLC porikkako segipa chatro chatrirang, an·tangtangni ma·siani aro poraianirango pangchakana bate CM guidebook gita dakgipa ki·taprango pangchakbataniko nikna man·aha indiba iandakgipa chatro chatrirangna 1^st aro 2^nd Division-rangko on·aha ine nikna man·a. 30-mangni gita mark-rangkoba ‘Choose the Correct Answer’ section-rangna on·aha aro ian chatro chatrirangni sena changani aro u·i-ma·sianirangko niani chol ong·ja gita nika. Unbaksana ‘grace mark’ ba ka·sachake on·dapgipa mark-rangchiba chatro chatrirangni result-ko dingtangatna man·a,” ine GHRSRF janapatenba, SSLC gita dakgipa porikkarango iandakgipa ja·kurangko de·aniara result-rangkode namdapatna man·a indiba chatro chatrirangni mikkangchi u·i-ma·siani aro susagrikanirangode nangchakeaniko ra·baani cholrang dongaia ine parakataha.
Poraia dontonganiko aro lekka pora man·aniko tang·doatna gita gipin nambata cholrangba donga ine janapatengon, porikkarango chu·sokgijagipa chatro chatrirangna apsan bilsion open schooling system-chi sepiltaina cholrangko on·na man·a aro iandakgipa cholrangchin pass ka·aniko nambatatna man·gen ine GHRCRF parakataha.
Meghalaya a·doko iandake pass ka·ataniko da·onin name nipiljagenchimode ja·mano lekka porani gita namjabata obostaona sokani cholrang donga ine jajrengchakenganiko parakatskaengon, iani bidingo name nipiltaichina gita GHRCRF, DSEL-ni Director-ko didiataha.
Iani bidingo apsan tom·e chanchirimna gita a·dokni Education Department-ko okamatengon, iana ja·mano uamang tarikko tik ka·e u·iatpilgen ine GHRCRF-ni dilgiparang parakataha.