Umiam Lake-o five-star hotel kulina tik ka·aniko jegale GTF jingjengata

SHILLONG: Ri Bhoi a·jani Umiam Lake-o donggipa Lumpongdeng Island-o five-star hotel aro spa kulina tik ka·aniko jegale Bristibar saloni Green Tech Foundation (GTF)-ni membor-rang, Shillong songjinmani Secretariat sambao okumu chake jingjengatna a·bachengataha.
Umiam Lake-ni Lumpongdeng Island-o five-star hotel aro spa-ko rikna gita acre 66 ong·gipa a·arangko Indian Hotels Company Limited (IHCL)-na sorkarini on·na tik ka·aniko GTF jegalenba, ia project-ko den·galpilchina gita sorkario dabiengachim ine nikna man·a.
Indake ong·genchimoba ia project-ko a·dok sorkari den·galpilkujaengani gimin Bristibar sal dipet GTF-ni membor-rang jingjengatna a·bachengskaaha.
“Chinga iano so·sojengjeng ong·atna miksonge iako dakenga ong·ja indiba Lumpongdeng Island-ni nitoani aro rongtalaniko nisigalanikosa jegalenga,” ine GTF-ni chairman H Banseiwdor Nonglang aganenba, iani bidingo uamang, a·dok sorkarina sedoataha aro nangchakenggipa official-rangkoba grongahachim ine parakataha.
Secretariat mikkango jingjengatanichi gari gorarangni re·ruraanirangko apchangket ong·batatenga ine official-rangni aganako jegalatengon, “Chinga gari gorarangni re·ruraaniko apchangket ong·atenga ine maikai uamang matnangna man·a? Ia biapon bus garirang park ka·enga aro uamang chingkosa matnangskaenga,” ine Nonglang aganaha.
Umiam Lake-ni Lumpongdeng Island-o Taj Umiam Resort aro Spa-ko rikna miksongengani gimin GTF, sorkarini kosako jegalengachim.
“Chinga ia project-kode jegalenga ong·ja indiba ia project-ko Lumpongdeng Island-o rikna miksongengani giminsa jegalenga. Ian Umiam Lake-ni bijangchisa ong·a indide maikai ia biapona dal·dalgipa ostrorangko ra·bana miksongenga? Ian Lumpongdeng Island-ko nisianisa ong·enga,” ine Nonglang aganaha.
Sorkarini on·enggipa acre 66 a·arangkode uamang den·galpilchina dabienga ong·ja indiba Lumpongdeng Island-ko man·chapenggipa acre 36 a·arangko den·galchinasa dabienga ine GTF-ni general secretary Ritre Lyngdoh parakatskaaha.
Uamangko police-rang rim·e pattoko donatgenchimoba uamang okumu chake jingjengataniko dontongjawa ineba GTF-ni dilgiparang parakataha.
“Uamang chingko rim·e pattokrango donatgenchimoba chinga pattokoniba okumu chake jingjengatangkuaigen,” ine Nonglang aganaha.
Ia project-ko aro Lumpongdeng Island-oniko ia contract-ko ra·pilaha ine sorkari chingna see on·genchimosa uamang okumu chake jingjengataniko dontonggen ineba GTF mikrakataniko on·angaha.