TURA: All Meghalaya Muster Roll Progressive Worker’s Union (AMMRPWU) aro Jaintia Hills Muster Roll Worker’s Labour Union (JHMRWLU) dolgni bakrime bikotgipa, Joint Action Committee Muster Roll Worker’s Union (JACMRWU), Muster Roll kam ka·giparangni man·gni aro adita ra·gatna nanggnirangni bidingo dabianirangko dake a·dokni skotong Minister-na on·gimin memorandum-na maming aganchakanirangko man·kujani gimin April 9 tariko Shillong aro Tura-o asonge jingjengatna (silent Sit-in-Demonstration) tik ka·aniko, Chief Minister Conrad K Sangma-ni ka·dongataniko man·a ja·man dontongataha ine JACMRWU-ni Adviser K.L. Pariat parakataha.
April 9 tariko, a·dokni skotong Minister Conrad Sangma, JACMRWU-ni dilgiparangko okamatenba iani bidingo agangrikangaha aro dabianirangko man·na dipet chu·sokatna ku·rachakaniko on·ahani gimin, jingjengataniko dakna miksonganiko dontongataha.
Joint Action Committee Muster Roll Woker’s Labour Union (JACMRWU)-ni battanggimin bilsi 2025 November 27 tariko on·gimin memorandum-o janapgiminrangara, Muster Roll-rangna on·gimin retirement bilsi 65-ko ja·rikangkuchina, bilsi 10 gapgipa Muster Roll-rangko Regular Casual Worker (RCW)-o segatchina, una agreba bilsini kri category ge·bri-o Muster Roll-rangko upgrade ka·china, aro Variable Dearness Allowance (VDA)-ko bariatchina, Employee’s Provident Fund (EPF)-ko ra·gatchina aro me·chikrangna on·gimin Maternity Leave aro Casual Leave-ko tik ong·e ja·rikchina aro dingtang dingtang department-rangni Muster Roll-rangni man·a nanggni dormaharangko jaanti on·china dabiangaha.
