SHILLONG: A·dokni dilgiparang aro dingtang dingtang Kristian ma·malrangba mol·molahani gimin Foreign Contribution Regulation Act (FCRA) Amendment Bill-ko ma·mong sorkari donchengaha ine BJP Meghalaya-na ku·wattimgipa Mariahom Kharkrang parakataha.
Kharkrang-ni kobor ra·timgiparangna parakatani gitade, Meghalaya a·doko BJP-ni dilgipa Alexander Laloo aro gipin dilgiparangba, ia FCRA Amendment Bill-ni bidingo dingtang dingtang dolrang baksa chanchirimchengkujaskal ia Bill-ko pass ka·jachina ma·mong sorkariko didiangaha aro ma·mong sorkari ia Bill-ko da·o donchengaha.
Bang·bata Kristian a·dokrangon, skulrangko, hospital-rangko aro dingtang dingtang kamrangko chalaianio, gipin a·songrangni dakchake on·aniosa pangchaktokengani gimin ia FCRA-ko taridapaniara, Meghalaya a·dok gita dakgipa Kristian a·dokrangna jajrengchakani ong·engachim.
Indake ong·engon, dingtang dingtang dolrangni aro dilgiparangni mol·molanirangko man·e, ma·mong sorkari, ia FCRA Amendment Bill-ko donchengna tik ka·angaha ine BJP Meghalaya-na ku·wattimgipa parakataha.
Adita salrangna skangsan, a·dokni Chief Minister Conrad K Sangma-ni dilanichi, Catholic Bishops Conference of India (CBCI)-ni dilgiparangba, Union Minority Affairs Minister Kiren Rijiju-ko New Delhi-o gronge, Foreign Contribution Regulation Act (FCRA) Amendment Bill-ko pass ka·na skang, dingtang dingtang dolrang baksa chanchirimchengchina gita didiangahachim.
Meghalaya aro salgro salaramni gipin a·dokrango, mongsongbate Tribal a·jarango gipin a·songrangni dakchake on·enggipa institute-rangan, lekka pora, an·seng baljokani aro songsalna dangdike on·enggiparang ong·ani gimin FCRA-ko taridapanio mitam niamrangara iandakgipa kamrangko champengani gita ong·enga ine a·dokni Chief Minister Conrad K Sangma aganenba, iani bidingo FCRA Amendment Bill-ko pass ka·na skang name nipilchina aro dingtang dingtang dolrang baksa chanchirimchengchina ma·mong sorkariko mol·molangaha ine parakatahachim.
FCRA-ko taridapgipa adita niamrangni gimin janapangengon, ia Act-o on·dapgipa mitam kattarangara, ‘gam-jinrangko rim·na’ dongimin niamrangba dongani gimin Kristian dolrang aro civil society organization-rangni gisepo jajrengchakani ong·katenga ine Chief Minister parakataha.
“FCRA-ko taridapanio mitam niamrangara, gam-jinrangko rim·ani bidingo janapahani gimin bang·a Kristian dolrangan jajrengchakaniko paraktokenga, uni giminsa pilakni namgninan apsan chanchirimchenge ja·kuko de·china chinga ma·mong sorkariko didiaha,” ine Sangma aganaha.
