TURA: Garo Hills Autonomous District Council (GHADC) election-ko ong·atninggija ra·doe donaniara niamni a·palo ong·enga ine Garo Hills-ni social activist sakgni, chong·motan Nilberth Ch Marak aro Flaming Marak parakatenba, election-ko ta·rake ong·atna gita ge·etaniko on·china a·dokni Governor-ko didiataha.
Iani bidingo a·dokni Governor-na seachi u·iatengon, GHADC election-ko somoi gita ong·atgija ra·doe donaniara niamni a·palo ong·enga ine social activist sakgni parakatenba, election-ko man·a dipet ta·raken ong·atna ge·etaniko on·china Governor-ko didiataha.
“Niam gitade election-ko War ba dinggrikani somoirango, tangka paisani gita neng·nikanirangko man·engmiting somoirango aro ong·telaigipa a·selrang ong·ani somoirangosa ra·dona man·aia indiba da·o dipet Garo Hills-o iandakgipa a·selrang ong·a dongkujani gimin GHADC election-ko sorkarini ra·doaniara niamni a·palo ong·enga,” ine social activist sakgni, Governor-na sedoatgipa chittio parakataha.
Batanggimin sal somoirango Garo Hills-o so·sojengjeng ong·angahaoba administration-ni rakbee kamko ka·anichi, tom·tomaniko ra·bapilna man·aha ine janapatengon, GHADC election-ko ta·raken ong·atna gita sorkarina ge·etaniko on·china uamang, a·dokni Governor-ko didiataha.
GHADC-ni term-ko ra·dodapaniba niamni a·palo ong·enga ine janapatskaengon, election-ko sorkari somoi gita ong·atna neng·nikanirangko man·enga ong·ode, Executive Committee-ni term-ko ra·doani pal GHADC-o Administator’s Rule-ko ra·gatskana nanga ine social activist sakgni, a·dokni Governor-ko didiataha.
