SHILLONG: Meghalaya a·doko drugs ba pekatgipa samrangko jakkalgipa manderang, jemang nampilna gita man·ahachim, uandakgipa manderang, apsan ramaonan re·angpiljana gita a·dok sorkarini ra·gatgipa Drug Reduction, Elimination & Action Mission (DREAM) program-ni ning·o, a·dokni dambri rehabilitation centre-rangna gong lak 9-na batgipa dingtang dingtang bosturangko sualataha.
Ia bosturangko sualatna program-ko ong·atanio, DREAM-ni Director Francis Kharshiing, jinmana aganprakengon, Meghalaya a·doko, mongsongbate Shillong songjinmao pekatgipa samrangko jakkalenggipa manderang bang·engahani gimin namen mikrakna nangani ong·engaha ine parakataha.
“Drug jakkalgiparangoni bang·batan heroin samko jakkalgiparang ong·a aro chingni nikani gitade, ian namen kenbatgnigipa ong·a,” ine Kharshiing aganaha.
Sam jakkalgipa manderang, salprakon gong 2000-2500 tangkarangko koros ka·ronga ine janapatengon, da·ode drugs-ni samrang batahani gimin mitam manderang, gong 10,000-mangni gita koros ka·na nangengaha ine DREAM-ni Director aganaha.
Kharshiing-ni aganani gitade, Shillong songjinmao police-rang, bilaken drugs badinganiko champengna gita jotton ka·engani a·sel drugs-ni damrang rakbatskaengaha aro iani a·selan drugs jakkalgipa manderang, cha·uani aro uandakgipa ong·gija kamrangko ka·skaengaha.
“A·doko iandakgipa neng·nikanirangko chagrongna nangengani gimin DREAM, a·dokni dingtang dingtang rehabilitation centre-rang, ITI-rang aro vocational training institute-rang baksa nangrime, drugs jakkalgipa manderangko namatna aro jemangan sanna bananirangko ra·engachim, uandakgipa manderangna training-rangko on·na miksongenga,” ine Kharshiing aganaha.
Drugs jakkalaoni nampilgiparangba 70-80 percent-ni gitade drug-rangko jakkalpilrongengani gimin iandake drugs jakkalpilaniko champengna DREAM kam ka·enga ineba ua parakataha.
Kharshiing-ni parakatani gitade, Mongolbar salo sualatgipa bosturangko, cha·ani tariani, chi pipe tariani aro bijoli sringani kamrangko skie on·anio jakkalanggen aro ia bosturangko man·gipa rehabilitation centre-rangara, me·chik aro me·asarangna New Hope, me·asarangna New Life De-addiction Centre, aro Asha Bhavan ong·a.
