AMPATI: Sukrobar salo, a·dokni Chief Minister Conrad K Sangma-na, South West Garo Hills a·jani Purakhasia C&RD Block ning·o donggipa Babelapara Higher Secondary School-o mande ra·pilskaani program-ko ong·atangaha.
Ia skulara, sak 600-mangni gita chatro chatrirangna Arts aro Commerce Stream baksa lekka porako on·enggipa private skul ong·a aro ia program-ko ia skulni School Managing Committee (SMC), All Meghalaya Upper Primary & Secondary Deficit Pattern School Teachers’ Association baksa nangrime ong·atangaha.
Ia program-ko ong·atanio, a·dokni Chief Minister Conrad K Sangma baksana Salmanpara-ni MLA Ian Botham K Sangma aro Babelapara-ni MDC Rakesh A Sangma-ba dongpae bak ra·angaha.
Ia program-ko ong·atanio, skulko chalaienggipa manderang, skul nokrang aro dingtang dingtang cholrang chu·ongjaengani gimin janapangenba, skul nokrangko namdapatna aro lekka pora on·aniko namdapatna gita dakchakanirangko on·china a·dokni Chief Minister-ko mol·molangaha.
Ia tom·aniko ong·atanio a·dokni Chief Minister, jinmana aganprakangengon, lekka porako tang·doatna gita sorkari, mongsonggipa daito ong·e jako ra·enga ine gisik ra·atpilaniko on·angenba, skul nokrangko rikdape on·na, chu·onga gita skigiparangko on·na aro pilakni gitan lekka porako namdapatna on·kange kamko ka·enga ine parakangaha.
Songadam nokadamrango lekka pora on·aniko nambatatna aro pilakan lekka porako ra·na gita cholrangko man·china sorkari kam ka·enga ineba ua aganaha.
National People’s Party (NPP)-ni niksamsoanirangko janapangengon, lekka porani kamrangko namdapatanian party-ni mongsonggipa miksongani ong·a maina ian chadamberangna janggi tangani cholrangko on·na man·gipa aro Meghalaya a·doko namroro silroroaniko ra·bana man·gipa ong·a ine Sangma aganaha.
A·dokni pilak biaprangon Lower Primary (LP) skulrangko namdapatna gita a·bachengo gong crore 2000-mangni gita korosko nangaha aro kamrangko dam 100 skulrangoni a·bachengate, da·o gadang gadang dake kamrangko ka·engkua ineba Chief Minister aganaha.
Babelapara Higher Secondary School-ni dingtang dingtang nanganirangna Chief Minister’s Development Fund-oniko gong lak 20 tangkarangko chamatenga ineba ia tom·anio Chief Minister parakataha.
Ia program-ko ong·atanio dongpae bak ra·anggipa gipin manderangara, South West Garo Hills a·jani Deputy Commissioner Anendya Raajsshre, Superintendent of Police (SP) Vikash Varma, Purakhasia Block-ni Block Development Officer Dr AC Marak, District School Education Officer A Karim, SDSEO E Ch Marak aro gipinrang ong·a.
