SHILLONG: Garo Hills Autonomous District Council (GHADC)-o gital songgipa Executive Committee (EC)-ara manderangni namnike songgipa EC ong·ja aro tangka paisa jakkalsretanirangna matnanga man·gipa ong·a ine Nationalist Congress Party (NCP) matnangatenba, GHADC-ni EC-ko all-party body ba pilak party-rangni bimang dake songpiltaichina, ong·jaode Administrator Rule-ni ning·o donatchina dabiangaha.
GHADC-ni term-ko jadokna ra·dodapatani ja·man, National People’s Party (NPP) aro Trinamool Congress (TMC)-ni dilanichi EC-ko chalaianiara kraani ong·ja maina ia EC-ara manderangni namnike songgipa EC ong·ja aro tangka paisa jakkalsretanirangna matnanga man·giparangsa ong·a ine NCP-ni state president Omilo K Sangma parakataha.
“Ia party dolgnini EC-ko chalaiangkuna gita niam dongja ine chingade nika maina uamangni kosako tangka paisa jakkalsretanirangna matnanganirang donga. Ia EC-ko pilak party-ni bimang dake songpiltaina nanga, ong·jaode GHADC-ko Administrator-ni ning·o chalaina nanga,” ine NCP-ni state president parakataha.
Tura-o tom·aniko ong·atangani ja·man NCP-ni dilgiparang, GHADC election-ko ra·dodapatgipa tarikoni jadokni gisepon ong·atchina dabina tik ka·angaha ineba Sangma parakataha.
Khasi aro Jaintia Hills Autonomous District Council-rango gitan GHADC-na electoral roll-ko dingtangmancha A·chik jatna tarichina gitaba NCP dabiangaha.
GHADC election-o A·chikrangna agre darang gipin jatrangko susana on·jachina gitaba NCP dabiangaha.
Indake ong·engon, re·anggipa jao Garo Hills-o so·sojengjeng ong·anina rim·a man·gipa dingtang dingtang dolni dilgiparangko ta·raken watpilchina aro batanggimin bilsi 22-ni gisepo GHADC-ko chalaiani aro tangka paisa jakkalsretanina matnanganirangko sandirokchina gitaba NCP dabiangaha.
