KHARKUTTA: Ia 2026 bilsini Secondary School Leaving Certificate (SSLC) porikkao Top 20-ni 10-gipa biapko man·e pass ka·anggipa Adokgre St Andrew’s Secondary School-ni chatro Emalton D Marak-na mande ra·pilskaaniko dakna aro ia bilsini SSLC porikkao pass ka·anggipa pilak chatro chatrirangna agan-ku·pattianirangko on·na gita Sukrobar salo, Felicitation-cum-Career Guidance program-ko United Kharkutta Government Higher Secondary School-o ong·ataha aro ia program-ko ong·atanio, Kharkutta-ni MLA Rupert M Momin, mongsonggipa sokgipa ong·e bak ra·angaha.
Ia program-ko ong·atna gita Kharkutta-ni MLA an·tangan tangka paisarangkoba dakchake on·aha aro unbaksana North Garo Hills a·jani District Administration-ba Chief Minister’s Youth Development Scheme-ni ning·o ia program-na dakchakanirangko on·aha.
Ia tom·anio, Kharkutta-ni MLA Rupert Momin, tom·anio bak ra·giparangna aganprakangengon, chubata gadangrango poraiangkuchina aro vocational training-rangkoba ra·china ia bilsini SSLC porikkao pass ka·anggipa chatro chatrirangko didiangenba, chadamberangna ua dingtang dingtang youth development scheme-rangko on·angkuna kam ka·gen ine ku·rachakaniko on·angaha.
Ia program-ko ong·atanio, North Garo Hills a·jani Superintendent of Police (SP) Pawar Swapnil Vasantrao-ba dongpae, jinmana aganprakengon, an·tangtangni janggi tanganio chu·sokgiparang ong·jaskal an·tangtangni nisanko watgaljachina aro bimchipe poraichina chatro chatrirangko ku·pattiangaha.
Ia program-ko ong·atanio, North Garo Hills a·jani Additional Deputy Commissioner YW Momin, Kharkutta Block-ni Block Development Officer Diganto Hajong aro dingtang dingtang official-rangba dongpae jinmana aganprakangaha.
Ia bilsini SSLC porikkao Top 20-ni 10-gipa gadango pass ka·gipa Adokgre St Andrew’s Secondary School-ni chatro Emalton D Marak-ba jinmana aganprakengon, ia porikkao maikai ua krenge poraianichi aro manderangni dakchakanichi chu·sokgipa ong·na man·aha, uarangni gimin agan-talatanirangko on·angaha.
Ia program-ko Kharkutta-ni Indigenous A·chik Youth Development Affairs (IAYDA) ong·ataha aro ia program-o dingtang dingtang skulni chatro chatrirang, skigiparang aro jolo songdongenggipa manderangba bak ra·angtokaha.
