BAGHMARA: Garo Student Union (GSU), Ruga Regional Unit (SZ) South West Garo Hills-o mongsongbate Gasuapara C&RD Block-ni ning·o donggiparangna Mahatma Gandhi National Rural Employment Guarantee Act (MGNREGA)-ni tangka paisarangko ru·uta somoirangna on·chipgija donengani gimin uarangko ta·raken on·china Deputy Commissioner-na badi ka·angaha. Union-ni badi ka·angani gita, 2025-26 financial year-ni ning·o kamrangko matchotman·ahaoba tangka paisarangko man·tokkujaenga. MGNREGA Act-ni niam gitade kam ka·a matchotani sal 15-ni gisepon tangka paisarangko watatna nangahachim. Indake ong·genchimoba bang·a kam ka·giparangan adita anti aro jarangnan tangka paisarangko man·gija dongkuenga ine aganangaha.
Iandake man·a nanggni tangkarangko on·anio ru·utataniara ia kamrango pangchake janggi tangenggipa bang·a nokdangrangnan uamangni dedrangko skul fee gamna nokdangni korosna cha·ani ringani dingtang dingtang nanganirangna namen neng·nikani ong·a ineba Union janapangaha. Iandake man·a nanggni tangka paisarangko ru·utatode mikangchi sorkarini scheme-rango bak ra·na ka·dongani komiata gita ong·a ine janapatskaengon, gital financial year-ni kamrang a·bachengtokpilaha indiba bang·a beneficiary-rangan batanggimin bilsiniko man·a nanggni tangka paisarangkon da·onaba man·tokuja. Unigimin ta·raken tangka paisarangko watatchina Deputy Commissioner-ko Union mol·molangaha.
