TURA: A·dokni dingtang dingtang gadango skigiparangna Structured Pay Framework (SPF) ba bimang done dormaharangko on·na tik ka·ahani gimin Sombar salo, All Meghalaya 4th Teachers’ Association (AM4thTA) Garo Hills unit-ni gita, mande ra·pilskaani program-ko a·dokni Chief Minister Conrad K Sangma aro a·dok sorkarina Tura-ni District Auditorium-o ong·atangaha.
Ia tom·anio, AM4thTA GHU-ni president Tengsrang K Sangma, rimchaksoani kattarangko aganangengon, ia 2026 bilsini April 1 tarik dipet SPF-ko a·bachengataniara, skigiparangni mikkim rasongko rakkiani aro skigiparangna gital ka·donganiko on·ani gita ong·aha ine parakataha.
Ia tom·anio a·dokni Chief Minister, tom·anio bak ra·giparangna, mongsongbate skigiparangna aganprakangengon, a·dokni manderang, an·tangtangni dilgiparangko dingtang dingtang kamrango chu·sokate on·aniko nangnika indiba bang·bata changon dilgiparang, iandake mittelpilskaanirangko man·rongja ine aganenba, ia program-ko ong·ate mande ra·pilskaaniko dakahani gimin association-ko aro pilak skigiparangkon mittelpilangaha.
2016 bilsio uni MP ong·e kamko ka·ani somoio ua skigiparang baksa bang·en agangrikna cholrangko mna·aha ine janapatskaengon, skigiparang baksa agangrikanirangchisa uamangni neng·nikanirangko ma·sie ra·na man·aha ine Sangma aganaha.
“Iani giminsa da·alo ua skigiparangni nanganirangko chu·sokate on·na aro lekka porani kamrangko namdapatna krenge kamko ka·enga,” ine ua aganaha.
Skigiparangna dormaharangko bariatanio mitam kamrangkode chu·sokatanio namen neng·beani ong·aha ine janapatskaengon, dingtanganiko ra·bana gitade ia kamrangko chu·sokate on·na nangchongmotgipa ong·skaaha ine Chief Minister aganaha.
Sorkariko chalaianio mongsonggipa miksonganirangko janapangengon, a·dokni manderangna dakchakanirangko on·na aro dangdike on·anian sorkarini miksongani ong·a ine Chief Minister parakataha.
Skigiparangni dingtang dingtang neng·nikanirangko namatna gita sorkarini ja·kuko de·anichi sak 23,000-na baten a·dokni skigiparang namgnirangko man·aha ine janapatskaengon, SSA, fourth teacher, adhoc, Hindi grant aro science grant-o skigiparangko man·chape dingtang dingtang gadango skigiparangni nanganirangko chu·sokatna sorkari ja·kuko de·aha ine Chief Minister aganaha.
Ia kamrangko chu·sokate on·na man·ahani gimin ua a·dokni Education Minister, official-rang aro gitcham dilgiparangkoba mittelpilangaha.
Lekka porani kamrango pangnan chatro chatrirangko mongsonggipa ong·e ra·na nangani gimin janapangengon, lekka porako on·anio skanggipa bi·sani giminsa chanchichenga ong·ode lekka poraba ka·sinsin tang·dobaaigen aro dingtanganiko nikna man·aigen ine Chief Minister parakataha.
Ia program-ko ong·atanio a·dokni Education Minister Lahkmen Rymbui aro PHE Minister Marcuise N Marak-ba dongpae jinmana aganprakangengon, skigiparangni namgnina ia SPF-ko tarie on·ahani gimin Chief Minister-ko mittelpilangenba, a·doko lekka porako namdapatna gita rakbate kamko ka·china skigiparangko didiangaha.
