NGH-ni PHE-o sak 17 muster roll-rangko ra·galani ja·man kamo ra·pilanina sing·doa

RESUBELPARA: North Garo Hills a·jani PHE department-o politician saksani ge·etaniko man·e, sak 17 muster roll-rangko ra·galaha indiba ja·mano uamangko kamo ra·pilaha ine kobor on·aha.
Kobor on·timgiparangni u·iatani gitade, ia obosta, North Garo Hills a·jani Mendipathar PHE sub-division-o ong·aha aro ia muster roll-rangko kamoniko ra·galani ja·man ra·gala man·gipa manderang, iani bidingo RTI file ka·aha aro social activist Nilbath Ch Marak-naba u·iataha.
Ia a·selni bidingo u·iataniko man·soani ja·man Marak, iani bidingo inquiry dakchina dabiangaha.
Kobor on·timgiparangni u·iatani gitade, Mendipathar PHE sub-division-o muster roll-ni kamko ka·e da·o bilsi 55-60 gapna sienggipa manderangko politician saksa ra·galchina aro uamangni biapo gipin kam ka·giparangko ra·skachina Mendipathar PHE-ni SDO-na ge·etaniko on·angaha.
“Kam ka·gipa mitam manderang baksa agangrikon, iandake kamoniko ra·galaniara niamni a·palo ong·a ine angna aganaha. Ia sak 17 muster roll-rangoni saksaba kam ka·jani gimin matnangako man·giparang ong·jachim indiba uamangko miksongmanchaen kamoniko ra·galaha,” ine Marak parakataha.
Ia sak 17 muster roll-rangko ra·galani ja·man department-ni ning·o adita golmalrang ong·angaha aro ja·mano SDO, muster roll worker-rang aro kamoni neng·takgimin mande saksa baksa tom·aniko ong·ate, iani bidingo talataniko on·china dabiangaha.
“Kam ka·giparang, officer-rangko gronge sing·sandion, bilsi 58 gapna sienggipa muster roll-rangkode ra·galna niam donga ine officer-rang aganchakaha. Kamoni neng·takangenggipa manderangna sorkarini u·iatanikoba uamang mesokaha. Indake ong·genchimoba, muster roll worker-rangna kamoni neng·takani bilsiko 65-ona sorkarini bariatanikode uamangna u·iatjaha. Iani bidingo officer-rangna mesoke on·on, uamang aganchakna man·jaha,” ine Marak parakataha.
Indake ong·engon, kamoniko ra·gala man·gipa muster roll-rangko ja·man department, kamo rakkipilaha indiba mikkangchi apsan dakgipa neng·nikanirangko chagrongtaina kam ka·giparang kenchaktokenga ineba ua aganaha.
“Chingko kamoniko ra·galani ja·man sako kamo ra·skana miksongani dongachim, uko ma·sina gitasa chinga RTI ka·aha aro chingni RTI-na aganchakaniko man·ahaosa chinga iani bidingo tale ma·sina man·gen,” ine muster roll worker-rangoni saksa aganaha.
Indake ong·engon, PHE-ni kamko ma·sigijagipa manderangkoba adita salrangna skang PHE department-o muster roll-ni kamna rakkiaha aro kamo rakkia man·gipa manderangoni mitamde, department-o kam ka·enggipa mandeni cha·parikgipa, driver aro noko kam ka·giparang ong·a ineba Marak parakataha.
Iani bidingo uamang bakan Meghalaya High Court-o badi ka·doanggen ineba Marak parakataha.