TURA: Lottery kal·atanio, chegipa mande sakgnina boksisrangko on·na jechakenga ine matnangenba, South Garo Hills a·jani social activist Greneth M Sangma, West Garo Hills Auto Rickshaw Association (WGHARA)-ni kosako, West Garo Hills a·jani Superintendent of Police (SP)-na badi ka·doangaha.
Lottery man·gipa mande sakgniko, cha·bokna jotton ka·enga ine matnangenba, ia mande sakgnini kosako FIR ka·ani ja·man WGHARA-ni kosako Greneth Sangma badi ka·doangskaaha.
Ia mande sakgnina boksisrangko on·na jechakengani gimin ia compensation ba tangka paisarangko gamskachina gitaba Sangma dabiangaha.
Sangma-ni SP-na badi ka·doanganio parakani gitade, WGHARA-ni ong·atgipa lottery-o saksa Jashtina Ch Marak minggipa me·chik, bongagipa boksis (Suzuki Celerio)-ko man·ahachim aro ua an·tangni lekkarangko mesokahaoba, association-ni manderang, uni bregipa tikitni counterfoil gimaenga ine una boksisko on·na jechakaiahachim.
“Jashtina Ch Marak, an·tangni boksisko ra·na gita baditaba chang Tura-o donggipa WGHARA-ni office-ona re·angahachim aro lottery-ni sub-agent Asana K Sangma-ba an·tangni Facebook account-o uko chegipa ine parakahachim. Indita chang ua an·tangni boksisko ra·na association-ni office-ona re·angahaoba una boksisko on·na jechakahani a·sel ua re·ruraanio aro korosrangchi neng·nikanirangko chagrongna nangaha,” ine Greneth parakatenba, uni ia pilak korosrangkon gamchina gita association-o dabiangaha.
“Ia mandeni neng·nikanirangko namatani pal association-ni membor-rang, Tura Cherangre-ni Panchi M Sangma aro Karukol Tainang songni Parbina Ch Marak-kosa social media-o viral ong·ata ine matnangenba FIR ka·skaaha,” ine Greneth parakataha.
