SHILLONG: 2027 bilsini Census-na Online Self-Enumeration campaign ba internet gita an·tangtangni nokdangrangni bidingo u·iatani program-ko Sukrobar salo, a·dokni Governor CH Vijashankar, Shillong songjinmani Lok Bhavan-o a·bachengate on·angaha.
Ia Digital Self-Enumeration campaign-ni bidingo official-rangni u·iatani gitade, ia online self-enumeration program-ara, Census 2027-ni mongsonggipa bak ong·enga aro ian technology-ko jakkale kamrangko nambatatna gita sorkarini kang·kare kae kam ka·aniko mesokani ong·enga.
Census-ko ka·anio a·doko songdongenggipa nokdang ge·antikon segatna man·na gita ia self-enumeration program-o somoi gita bak ra·chinaba official-rang, a·doko songdongenggipa manderangko didiataha.
Ia campaign-ko a·bachengatanio, a·dokni Governor an·tangan online gita self-enumeration ba an·tangni bidingo u·iataniko dakangaha.
Ia tom·anio a·dokni Governor, tom·anio bak ra·giparangna aganprakangengon, ia online self-enumeration ba internet gita an·tangtangni gimin u·iatani kamara namen altubegipa, parakani donggipa aro jakkaltobegipa ong·a ine aganangenba, ia kamo bak ra·china gita a·doko songdongenggipa pilak manderangkon didiangaha.
Ia bilsini Census-ko ka·anio maming sesretani gri, name aro somoi gita matchotatna man·gen ine an·tangni ka·dongchakenganiko parakangengon, ia kamko ka·anio Directorate of Census Operations-ni Office-naba ua an·tangni namgipa skaniko on·angaha.
Ia Online self-enumeration campaign-ko a·bachengatanio, a·dok sorkarini Commissioner & Secretary aro Census-ni State Nodal Officer Dr Pooja Pandey, India sorkarini ning·o donggipa Census Operations-ni Director Biswajit Pegu aro gipin official-rangba dongpae bak ra·angaha.
Ia online self-enumeration campaign ba an·tangtang biming segatani cholko a·doko songdongenggipa manderangna, May 1 tarikoni May 15 tarikona on·anggen aro iano nokdang ge·antian, an·tangtangni nokdangrangni gimin online platform-o gapate on·na nanggen. Ja·mano iako enumerator-rang, nokdang ge·prakprakchi re·e biming segatani somoio name nipiltaianggen.
