Shillong: 2026 bilsini May 1 tarikoni Meghalaya a·doko House Listing aro Housing Census (HLO) Operation-ni skanggipa gadangko a·bachengataha. Skanggipa changna nokdang antian uamangni gimin talate on·angna chol dongaha uan Self-Enumeration web portal jean dingtangtegipa SE ID-ko on·gen jekon Enumerator-chi confirm ka·gen jensalo ua nokantiona wenbaani somoio nianggen. Self -enumeration-na chol on·gipako 2026 bilsini May 1 tarikoni a·bachenge May 15 tarikonasan somoiko on·angaha aro nokantiona re·e chananiko 2026 bilsini May 16 tarikoni June 14 tarikona dakanggen. Self enumeration-ko nokdangna nokdangni je membor-rangchiba dakna man·gen.
A·doko skanggipa Meghalaya Governor Shri C.H Vijayashankar Shillong Lok Bhavan-o self-enumeration portal-o biming segatchengaha.
Meghalaya Legislative Assembly-ni Speaker Shri Thomas A Sangma una offcial-ni gita dongchakna on·gipa Rupshi Bunglow-o self-enumeration-ko matchotaha.
Meghalaya a·dokni Chief Minister Shri Conrad K Sangma una official-ni gita dongchakna on·gipa Goodwood Bungalow-o self-enumeration daka matchotaha.
Deputy Chief Minister-rang Shri Prestone Tynsong aro Sniawbhalang Dhar uamangba Chief Minister-ni official nok Goodwood Bungalow-o an·tangtang self-enumeration dakaha.
East Khasi Hills District-ni Deputy Commissioner, Directorate of Census Operation-oni official-rang aro a·dok sorkarini a·gipi official-rang baksana Census-na State Nodal Officer aro Meghalaya sorkarini Commissioner aro Secretary-ni dongpaanio kosako janapgimin self-enumeration-ko dakdilangaha.
House Listing aro Housing Census (HLO) Operation-ni skanggipa gadangna self-enumeration portal-ko jakkalchina songdonggipa gimikon didiangaha aro ian namen altubegipa portal ong·a ine dilgiparang talatangaha.
