AMPATI: 100 Days Tuberculosis (TB) Campaign-ni ning·o TB aro Non-Communicable Disease (NCD)-na Screening Drive dakani program-ko South West Garo Hills a·jani pilak sorkari department aro office-rangon, ia bilsini June jaona ong·atanggen ine South West Garo Hills a·jani Deputy Commissioner parakataha.
Ia Screening Drive ba porikka ra·ani program-ko SWGH a·jani Health Department, dingtang dingtang department-rang baksa nangrime, seng·gnang rim·na man·e sanna bananirangko on·na gita TB, hypertension, diabetes aro cancer saanirangna dakenga.
Seng·gnang porikka ra·e ma·sie ra·anichi manderangko sabisi sakanchirangoni chel·e dongatna gita ia Screening Drive-ko ong·atenga ine u·iatengon, TB aro NCD gita dakgipa saanirangko batrorojana gita ta·raken sanna bananirangko on·na nangchongmota ine Deputy Commissioner parakataha.
Je department-rangkon ia program-ni ning·o ra·kujachim, re·baenggipa antirango bak dake ra·anggen ine u·iatengon, tik ka·gimin tarikrango an·tangtangni officer-rangko aro kam ka·giparangko biapona sokatchina aro Health department-ni manderangna dakchakaniko on·china gita Deputy Commissioner, pilak department-ni dilgiparangna ge·etaniko on·angaha.
