SHILLONG: Meghalaya a·doko, mongsongbate Khasi Hills jolrango bading chiwalgiparangoniko Hynniewtrep National Liberation Council (HNLC) bobil dol, Whatsapp social media gita tangkarangko dabienga ine matnanganirangko man·ahani gimin tangka dabianirangko man·soon, jrip dongaigija, uarangko police ba sorkarina badi ka·china gita a·dokni Deputy Chief Minister aro Home (Police) Minister Prestone Tynsong didiataha.
Iani bidingo adita salrangna skangsan sorkari chanchirimangaha aro je manderangan, tangka dabianirangko man·soengachim, uandakgipa manderang, police ba sorkari official-rangna badi ka·skana nanga ine Tynsong aganaha. Manderang, sepangbatgipa police station, police outpost, district police headquarter ba unaba iarangni bidingo u·iatna man·aigen ineba ua aganaha.
Manderangna naljokaniko on·na aro tom·tome bading chiwalna man·na gita sorkari kamrangko ka·enga ine janapatengon, iandakgipa kamrangni bidingo police-rangna u·iatgenchimode ta·raken ja·kurangko de·aigen ine Home Minister aganaha.
Tangka dabienggiparangni kosako maini gimin police-rang, an·tangari ja·ku de·jaenga ine sing·anina aganchakaniko on·angengon, tangka dabianiko man·soenggipa manderang an·tangtangan u·iatjagenchimode basako ia dabiani message-rangko watatachim, uarangko police-rang ma·sijanaba gnang ine Tynsong aganaha.
Bobil dake chakatgipa manderangnasan ong·aigija, ong·gija dakgipa manderangni ka·mikkenatanirangna kenjachina gitaba Tynsong, a·dokni manderangko didiataha.
Adita salrangna skangsan Shillong songjinmao bading chiwale cha·enggipa aro dokkan dake cha·enggipa manderangoniko HNLC bobil dol, ‘income tax’ ine pa·sikenba, Whatsapp gita tangka dabiataha ine koborrangko man·soahachim.
Bading chiwalgiparangoniko ia bobil dol, gong lakni lak tangkarangko dabiatenba, tangkarangko on·jagenchimode so·ote galna ka·mikkenatanirangko on·aha ineba kobor on·ahachim.Iani bidingo East Khasi Hills a·jani SP Vivek Syiem-o sing·sandiaton, tangka dabia ine matnangenggipani bidingo darangba police-rangna FIR ka·kuja ine ua parakataha.
