TURA: 2027 bilsina India a·songni Census-ko a·bachengengahani gimin ia census ka·anio sorkari official-rang aro enumerator-rang baksa bakrimaniko on·china, West Garo Hills a·jani Deputy Commissioner, a·jao songdongenggipa pilak manderangkon didiataha.
Deputy Commissioner-ni u·iatani gitade, 2027 bilsini Census-ko bakgni dake ong·atenga aro skanggipa bakko May 16 tarikoni June 14 tarikona nokking hisap aro nokrik-nokdakanirangko chananggen.
Apsan somoion, skanggipa changna pilak nokdangrangan, ia May 1 tarikoni May 15 tarikona self enumeration ba an·tangtangko online gita chananiko dakna man·gen. Ian nengrabegipa kam ong·a aro uko dakna gita ia mesokatenggipa link https://se.census.gov.in
Gnigipa bakara Population Enumeration ba mande jelbra jelsuaniko ma·sina mande sakprakko chanani ong·a. Iako re·baenggipa 2027 bilsini February jao a·bachengatskagen.
Iako Census Act, 1948-o pangchake ong·atenga aro ian skanggipa changna mobile app-rangko jakkale data chimongani digital Census-ba ong·enga.
