SHILLONG: Ri Bhoi-o batanggimin adita salrang skang saksa ma·gipa an·tangni atchidal bi·sako mangittang gope galani mamlao jajrenge State Commission for Protection of Child Rights, mikkangchi iandakgipa kenbegnigipa a·sel ong·anirangko champengna miksonganio awareness campaign-ko ong·atna aganaha.
Sonibar salo kobor ra·timgiparang baksa agangrikmitingo SCPCR-ni chairperson Agatha Sangma, indine aganaha, “a·doko atchidaldal bi·sarangko watgalanga ba so·ote gala iandakgipa obostarangko nikna man·engon, ian a·dokna bilongen jajrengani ong·a, iandakgipa obosta ba a·sel ong·arangko champengna gita Commission, ja·ku de·gen.
Ma·giparangni bi·sarangko indake ramao gale donanga ba so·otna jotton ka·anirangko champengna gita bilaken kam ka·angna nanggen, ma·giparangko gisikni gita bilakatna nanggen ine Agatha aganaha.
Ri Bhoi-o meja April 27 tariko Mawhati jolo atchidal bi·sako gope galaha, jekon school bi·sarang nike adubekoniko ra·angkote ta·raken Nongpoh Civil Hospital-ona ra·angaha. Iani bidingo Nongpoh Women Police Station-o mamlako segataha aro authorities, mamlako sandienga.
