SHILLONG: Jaintia Students’ Union Central Body-ni Education Department, Education Department-ni Minister Lahkmen Rymbui-ko Jowai Polytechnic-o gronge memorandum-ko on·e Jaintia Hills aro Meghalaya-ni gipin bakrangoni chatro-chatrirangni chagronggipa neng·nikarangko janapangaha.
Union, memorandum-ko a·dokni dingtang dingtang sorkari colleges aro school-rangni principal-rang baksa chanchirimani ja·man tariaha.
Union dabigiparangara- JSU, sorkariko Meghalaya Educational Institutions (Regulation of Fee) Act-ko ra·gatchina mol·molaha, jedakode educational institution-rangni fee bariatako nirokna man·gen. Fee bilongani a·sel kangal cholgri nokdangrangna bi·sarangko poraiatanio bilongen neng·nikani ong·a.
Una agreba sorkari school aro college-rango evening shift- class-rangko donchina mol·molaha. Jedakode admission man·a neng·nikgipa chatro-chatrirangna dakchakani ong·gen. Evening section-rangko kuliata ong·ode bang·bate admission man·a neng·nikako man·enggipa chatro-chatrirangna biaprangko on·na baksana bang·a institution-rangni infrastructure-ko kra bewalo jakkalna man·gen.
Uni gisepon union, Government Girls Higher Secondary School-o Biology teacher dongjani a·sel ta·raken skigipako rakkichina dabiaha. Una agreba gipin dingtang dingtang institution-rango bangbang ong·e donggipa biaprangko gapatchina mol·molaha.
National Education Policy (NEP) 2020-ni bidingo studeng body, sorkariko educational institution-rango smart classrooms, science laboratories aro vocational learning tool-ko donchina mol·molaha. Iarangna agreba school aro college-rango skia man·gipa ba train counsellor-rangko rakkina nangnikaniko aganaha.
