Assam-o gital sorkariko rikani ja·mansa simani bidingo agangriktaigen

SHILLONG: Assam a·doko gital sorkariko rikani ja·man regional committee-ni dilgiparangko seokahaosa Assam aro Meghalaya a·dok damgnini simarango ong·enggipa golmalrangko namatna agangrikaniko a·bachengpiltaina man·gen ine Sombar salo, a·dokni Deputy Chief Minister aro West Jaintia Hills regional committee-ni chairman Sniawbhalang Dhar parakataha.
“Assam-o gital sorkariko rikani ja·man regional committee-ni dilgiparangko uamang chingna u·iatahaosa, a·dok damgnini simarango ong·enggipa obostarangko namatna gita agangrikaniko a·bachengpiltaina man·gen,” ine Dhar aganaha.
Dhar-ni aganani gitade, Assam a·doko gital sorkariko rikani ja·man regional committee-ni dilgiparangko u·iatahaosa Meghalaya a·dokchipakniba Assam-ni regional committee-rang baksa agangrikna kamko a·bachengpiltaina man·gen.
A·dok damgnini gisepo meligrikna man·jaenggipa bangki biaprangoni Block-I jolrangba damsa ong·a aro ia Block-I-ni bidingo Meghalaya a·dokchipakni report-kode matchotaha indiba sorkarina on·kujaenga ineba West Jaintia Hills regional committee-ni chairman parakataha.
“Block-I-ni report, district administration-ni jakon ong·a indiba ia report-ko donkuchina chinga aganahani gimin district administration, sorkarina on·kujaenga,” ine ua aganaha.
Ia jani bon·angachibara, ia report-ko a·dok sorkarina on·china ua district administration-na u·iatnaba gnang ine janapatengon, Assam a·dokchipakni gital chairman-ko songahaon Meghalaya a·dokchipakniba nanga gita ja·kurangko de·gen ine a·dokni Deputy Chief Minister aganaha.
Block-I-ni ning·o donggipa songrangko a·dok damgnini dilgiparang basako re·ange nina miksongenga ine sing·anina aganchakaniko on·angengon, tarikrangkode a·dok damgni nangrimesa tik ka·gen ine Dhar parakataha.
“Iani bidingo chinga a·dok sorkari dolgnisa melie chanchirimgen,” ine ua aganaha.
Official-rangni tom·e chanchirimani ja·man, Khanduli-Lapangap jolrango da·o dipet tom·tomenga ineba Deputy Chief Minister parakataha.
Dhar-ni aganani gitade, re·anggipa May-ni 5 tariko, Assam Assembly election-ni result-rangko parakani ja·man, West Jaintia Hills a·jani Deputy Commissioner aro Karbi Anglong-ni Deputy Commissioner, Khanduli aro Lapangap songko dilgiparangni dongpaanio tom·e chanchirimangaha aro da·o dipet ia jolrango tom·tomaniko man·engaha.