Niamko ja·rike nambatgiparangkosa kamna ra·a ine a·kanga
TURA: South Garo Hills a·jani District Selection Committee (DSC)-o niamrangko ja·rikgija, interview-o pass ka·gijagipa candidate-rangkoba kamo ra·aha ine matnangenba, Jhonprizebirth Sangma minggipa mande saksa, a·songni Prime Minister Narendra Modi-na badi ka·e sedoatani ja·man, iako DSC-ni Chairman aro South Garo Hills a·jani Deputy Commissioner jegalatenba, DSC-ni niamrangko ja·rike aro nambatgipa candidate-rangkosa seoke, kamo ra·aha ine a·kangatskaaha.
DSC-ni kosako matnanganirangko jegalatengon, Lower Division Assistant (LDA)-ni kamna Baghmara-o dingtang dingtang porikkarangko ra·aha aro nambatgipa candidate-rangkosa seoke kamrangko on·aha ine DSC-ni Chairman aro South Garo Hills a·jani Deputy Commissioner parakataha.
“LDA-ni kamna dorgasto man·sogipa sak 3483 candidate-rangoni sak 1492 candidate-rang, typing test-ko ra·aha aro sak 247 candidate-rang written test-na chu·sokgipa ong·aha. Ia sak 247-oni sak 191 candidate-rang, written test-ko seaha aro sak 191-oni sak 59, personal interview-na seokako man·aha. Personal interview-na seoka man·gipa pilak sak 59 candidate-rangan interview-o mikkangpaaha aro ia sak 59 candidate-rangni interview-rangko name nipilangani ja·man, niamrango pangchake nambatgipa sak 18 candidate-rangko LDA-ni kamna seokaha,” ine South Garo Hills DSC-ni Chairman aro South Garo Hills-ni Deputy Commissioner parakataha.
DSC-ni parakatani gitade, dingtang dingtang porikkarangko ra·anio, Jhonprize Sangma-naba gipin candidate-rang gitan apsan cholrangko on·aha aro porikkarangko ra·engmiting somoirangode darangba, kamna seokaniko jegalgiparang dongjachim.
“Porikkako ra·engmiting pilak gadangrangon darangoniba matnangani ba badi ka·anirangko man·soa dongjaha aro Jhonprizebirth Sangma an·tangba maming badi ka·anirangko dakjaha,” ine DSC-ni Chairman parakataha.
“Gipin sak 58 candidate-rang baksa ua (Jhonprizebirth)-ba, personal interview-o donge mikkangpaaha aro pilak candidate-rangnan apsan niamko done, candidate-rangko kamna seokaha,” ineba DSC-ni Chairman aro South Garo Hills a·jani Deputy Commissioner parakataha.
DSC-o niamrangko ja·rikgija, interview-o pass ka·gijagipa candidate-rangkoba kamo ra·aha ine adita salrangna skangsan, Jhonprizebirth Sangma matnangatenba, iani bidingo a·songni Prime Minister-na seachi badi ka·doatahachim.
South Garo Hills a·jani DSC-o niamrangko pe·e, sorkari official-rangkoba membor dake donenga ineba Sangma badi ka·doangaha.
