SHILLONG: Meghalaya a·doko Jal Jeevan Mission (JJM)-ni kamko ka·gipa contractor-rangna a·dok sorkari, gong kror 900-mangni gita tangka paisarangko gamna nangengon, a·dokni Autonomous District Council (ADC)-rang, 15th Finance Commission-ni ning·o chame on·atgipa tangka paisani Utilisation Certificate-rangko (UC)-rangko on·kujaengani gimin ma·mong sorkari, Jal Jeevan Mission (JJM)-ni tangka paisarangko a·dokna watatkujaenga aro iani a·selan contractor-rangna bangki grorangko gamna man·kujaenga ine Budbar salo, a·dokni PHE Minister Marcuise N Marak parakataha.
Adita salrangna skang, a·dokni Chief Minister baksa Taraghar guest house-o tom·e chanchirimanirangko janapatengon, JJM-ni grorangko gamna man·kujaenganiara a·dok sorkari ba PHE department-ni a·sel ong·ja ine Marak a·kangataha.
“JJM-ni bill-rangko gamna man·chipjaenganiara Meghalaya sorkari ba PHE department-ni a·sel ong·ja indiba India sorkarionin tangka paisarangko watatkujaengani giminsa ong·enga,” ine ua aganaha.
India sorkarioni dingtang dingtang niamrangko donataha ine janapatengon, a·dokni PHE department-de, bang·bata niamrangkon chu·sokatahachim ine Minister aganaha.
“India sorkarini dongimin niamrangoni 70 percent-na baten chinga chu·sokatna man·aha aro Jal Shakti Ministry-ni dongimin niamrangko chinga matchotna siengaha. Tangka paisarang sokbaahaode chinga bangki grorangko gamna man·gnok,” ine Marak aganaha.
District council-rang utilization certificate-rangko on·kujaengani a·selsa neng·nikanirangko chagrongna nangenga ine janapatengon, “15th Finance Commission-ni Tied fund-oniko India sorkari, a·dokni damgittam district council-rangna tangka paisarangko chame on·ataha. Angni chanchiani gitade, 2021-22 bilsirango gong kror 45-mangni gita tangkarangko district council-rangna chamatahachim. Da·o ia tangkarangna UC-rangko India sorkari, district council-rangoniko bi·engaha. Mitam district council-rangde ia tangkani UC-rangko tarian matchotkujaenga,” ine PHE Minister parakataha.
Iani bidingo a·dokni Chief Minister an·tangan kamrangko niatna ku·rachakaniko on·aha ine janapatengon, “Iandakgipa neng·nikanirangko chagrongna nangengani gimin chinga Chief Minister-na talate on·aha aro district council-rang UC-rangko sumbit ka·china gita a·dokni chief secretary aro additional chief secretary-ko dingtang tom·e agangrikchina Chief Minister ge·etaha. District council-rang, an·tangtangni jakkalgipa tangka paisani UC-rangko on·ahaon chinga JJM-ni grorangko gamna gita India sorkarioniko tangka paisarangko bi·atna man·gnok,” ine Marak aganaha.
District council-rang UC on·kujani a·sel JJM-ni tangkarangko watatkujaenga: PHE Minister
Date:
Share post:
