Tura Ringre-o bijoli line-ko bol be·dapa
TURA: Batanggimin sal somoirangonin Garo Hills-ni dingtang dingtang biaprango, mikka kimpretani baksa mikka balwa ta·rakanirangko nikna man·engon, Sonibar waloba, Garo Hills-ni dingtang dingtang biaprango mikka balwa ta·rakaniko nikangtaina man·aha aro bang·bata biaprangon balwa ta·rakanganichi, bol be·anirangko nikna man·aha.
Garo Hills-ni mitam biaprango, mikka balwa ta·rakanganichi, bijoli sianirangkoba chagrongna nangtokaha indiba bijoliko teng·atpilna gita MeECL-ni manderang rakbee kamrangko ka·aha.
Garo Hills-ni bang·bata biaprangon mikka balwa ta·rakanganichi bol be·anirangko nikna man·ahaon, Tura-oba Ringre-o donggipa Tura Government Girls Higher Secondary School sambao, 33KV Tura power line-ko dal·begipa bol pangsa be·dape, adita somoirangna bijoli sina nangaha.
Ia bol be·ani bidingo kobor man·soa bakan MePDCL-ni manderang, Forest, SDRF aro DDMA-ni dakchakanichi, bijoliko on·pilna gita rakbee kamrangko ka·aha aro adita somoirangni ja·man bijoliko on·piltaina man·aha.
Mikka balwarang, Sonibar walni 10:00 bajimangonin ta·rakna a·bachengaha aro uandaken Robibar pringonan mikkarang waangkuenba, dingtang dingtang biaprango, bol be·anirangko aro a·a be·wakanirangkoba knasona man·aha.
Koborko on·ani gitade, mikka balwa ta·rakanganichi, Hawakhana Sub-station-ona ra·anggipa 33 KV line-ko man·chape dingtang dingtang biaprango bijolirang nosto ong·aha aro bang·bata biaprangon manderang, adita somoirangna bijoli gri dongna nangtokaha.
Mikka balwa ta·rakanganichi be·gipa bolrangko aro bijolirangko West Garo Hills a·jani Deputy Commissioner Vibhor Aggarwal-ni nirokanichi, MePDCL, Forest aro DDMA-ni manderang taripilna kamrangko ka·aha.
