Pilak political dolrang baksa chanchirimna BJP didia
SHILLONG: School Education ba skulrango lekka pora on·aniko Union Education Ministry-ni gitalbatsranggipa Performance Grading Index (PGI)-o Meghalaya a·dokko bon·kamgipa biapo donattaiani ja·man dingtang dingtang political party-rang, suk ong·gijaniko parakatenba, iani bidingo NPP-chi dilenggipa MDA sorkariko matnangattokaha.
Union Education Ministry-ni PGI-o Meghalaya a·dokko 401-460 point bracket-o donataniara, a·songo ja·manchakbatsranggipa ong·aniko mesokani ong·aha aro ian Meghalaya a·dokni skulrango lekka porako on·anio kolgapgijanirangko mesokaniba ong·aha.
Ia PGI-ko Education Ministry, skulrango bi·sarangni skie ra·ani, skul nokrang, skulko chalaiani aro skigiparangna training-rangko on·anio tosusae, point-rangko on·aha.
Education Ministry-ni PGI 2.0-o Meghalaya a·dok, bon·kamgipa biapko man·taiahani gimin Meghalaya BJP-ni general secretary Wankitbok Pohshna, suk ong·gijaniko parakatengon, iani bidingo pilak political party-rang aro dingtang dingtang dolrang baksa apsan chanchirimchina didianiko on·angaha.
Lekka porao Meghalaya a·dokni bon·kamgipa ong·enganiara, lekka porani kamrangko chu·gimik gital dake nipiltaina mesokani chinsa ong·enga ineba Pohshna aganaha.
Skulrango bi·sarangna lekka porako on·anio kolgapgijanirangko sandie kolgapatna aro skulrango, mongsongbate songadam nokadamrango, bi·sarangna namgipa skul nokrangko aro toilet-rangko on·na gita BJP, ‘Learning Recovery Mission’-ko a·bachengatna miksongenga ineba Pohshna parakataha.
Skulrango audit-rangko dakjringanichi aro songko nokko dilenggiparang an·tangtangan nirok sandijringanichi, skulko chalaianio parak ong·ani dongna nangengani giminba BJP-ni dilgipa aganaha.
Indake ong·engon, Union Education Ministry-ni PGI 2.0-o Meghalaya a·dok, bon·kamgipa biapko man·taiahani gimin Congress dolba, MDA sorkariko matnangataha.
Sorkari, dingtang dingtang program-rangko ra·gatani bidingo ‘press release’-rangchi parakanirangko dakengoba, lekka poranio tang·doani pal batesa tang·onrikrikangenga ine Congress dolni dilgipa Manuel Badwar matnangataha.
Nangchongmotgipa kamrangko ka·chengani gri, ‘ma·mong sorkariko’ kusi ong·atnamangmang a·dok sorkari, National Education Policy (NEP)-ko ra·gatna sikkelaha ineba Badwar matnangataha.
“Press release-rangchi kam ka·anide an·chingni bi·sarangna maming namgniko ra·bana man·jawa,” ine ua aganaha.
Skigiparangko, skulrango skie on·atani pal, dingtang dingtang kamrango jakkalengani giminba Congress dol, MDA sorkariko matnangataha.
