TURA: Garo Hills-ni dingtang dingtang songrangko A·chik bimingchi mingsrechina gita dabie, Garo Hills-ni dingtang dingtang dolrang, chong·motan Niksamso Garo Community Organization (NGCO), A·chik National Youth Organisation (ANYO), aro A·chik Conscious Holistically Integrated Krima (ACHIK), Garo Hills Autonomous District Council (GHADC)-ni Chief Executive Membor (CEM) Dhormonath Sangma-na memorandum on·angaha.
GHADC-ni CEM-na sedoatgipa chittio NGO-rangni parakatani gitade, Garo Hills-ni Sixth Schedule ning·o donggipa bang·bata songrangkon, jatni daka rikani, jat ong·ani aro chengoni man·rikanio pangchake bimingrangko mingachim indiba somoirang re·angroro, mitam songrangkode gipin ku·sikrangchisa mingna a·bachengaha aro sorkarini gitaba gipin ku·sikrangchi minggipa bimingrangkosa songna jakkalbaaha.
Tura jillani ning·o donggipa Araimile, Dermile aro gipin gittimrangna agreba, Baromile, Phulbari, Rajabala, Selsella, Bhaitbari, Gomaijhora, Mirjumla, Batabari, Balachanda, Bajengdoba, Holdibari, Dainadubi aro uandakgipa songrangko A·chik bimingchi mingsrechina gita NGO-rang, GHADC-ni CEM-ko didiataha.
Ia biaprangko, Indian Constitution-ni Sixth Scheduled ning·o Tribal-rangko chel·chakna on·gimin niamrango pangchake, A·chik bimingrangchi mingsrena gita ta·raken ja·kuko de·chinaba NGO-rang, GHADC-ni CEM-ko didiataha.
A·chikrangni ku·aganani, daka rikani aro jat ong·aniko mikkangchi tange rakkina gitade A·chik songrangko ku·siktangchi mingna nangchongmota ine janapatengon, mikkangchi A·chik songrangko jatni daka rikanio pangchake rakkiangna man·na gita pilak songrangkon A·chikkuchi mingsrechina NGO-rang, GHADC-ni CEM-ko didiataha.
