SHILLONG: Ma·mongni dilgiparang nangnikgenchimode, Meghalaya Pradesh Congress Committee (MPCC)-ni president ong·e kamko ka·na kusi ong·aigen ine MPCC-ni working president aro a·dokni gitcham Deputy Chief Minister Deborah C Marak parakataha.
Da·o ong·enggipa MPCC-ni president Vincent H Pala-ko Shillong Lok Sabha by-election-o susaatna miksonganirang dongengani gimin Marak, ia kattarangko aganaha.
Iani bidingo kobor ra·timgipa manderang baksa agangrikengon, da·o ong·enggipa MPCC-ni president Vincent Pala, Lok Sabha-ni membor ong·na nanggenchimoba Congress dolni kamrangko ka·anio maming neng·nikani grian ka·na man·aigen ine Marak aganaha.
Marak-ni parakatani gitade, MPCC-ni president Vincent Pala, a·dokni kamrangko ka·engoba, a·songni kamrangko ka·naba saksa kamni gimin ma·sigipa ong·a.
“Vincent Pala, skangoba MP aro Union Minister ong·aha indiba ua a·dokni kamrangkoba jako ra·e ka·aha. Delhi-ona re·angani ja·manba ua a·dokni kamrangko nirokatna man·kuaigen,” ine MPCC-ni working president aganaha.
Marak-ni aganani gitade, mitam dilgiparang, kam minggittam mingbriko jako ra·e ka·genchimoba, maming neng·nikani grian ka·na man·aia.
Mikkangchi ua MPCC-ni president ong·e dilani cholrang dongama ine sing·anina aganchakaniko on·angengon, ia pilakan ma·mongo party-ko dilenggiparangni nangnikaniosa pangchakaigen ine Marak parakataha. Ma·mongni dilgiparang, uko nangnikgenchimode ua kusi ong·en an·tangna on·gipa kamrangko ka·aigen ine ua aganaha.
“MPCC angko angko nangnikgenchimode anga kusi ong·en ra·chakaigen. Anga jeoba ong·bo apsan kam ka·rimanikosa angna nanga. Angna president aro party-o ong·enggipa membor sakantini pattianikon nanga,” ine Marak aganaha.
Meghalaya a·doko Congress dol, MLA aro MDC-rang dongjahani gimin janapatengon, onbatgipa gadango party-na dangdike on·enggipa manderangan party-ni bilrangde ong·a ine MPCC-ni working president parakataha.
Garo Hills-o Congress-na chakgiparang komiangengaha ine agananiko jegalatengon, “Garo Hills-o Congress-na chakgiparang batasa batrorobaenga. Dilgiparangko seokgipa manderang namen seng·giparang ong·a aro uamangsa dilgiparangko tarigipade ong·a,” ine Marak aganaha.
