TURA: A·dokni dingtang dingtang District Institute of Education & Training (DIET)-rango poraigipa chatro chatrirang, 2024 bilsioni 2026 bilsiona kingkingan stipend-rangko man·tokkujaengani a·sel chatro chatrirang, mongsongbate tuition fee, lekka ki·tap, hostel koros aro songre songgabatna gita stipend-rango pangchakenggiparang neng·nikanirangko chagrongna nangtokenga ine AHAM Eastern Zone Williamnagar badi ka·doangenba, ia chatro chatrirangna, stipend-rangko ta·raken on·china sorkariko didiataha.
Iani bidingo, a·dokni Chief Minister Conrad K Sangma-na badi ka·e sedoatengon, a·dokni dingtang dingtang biaprango DIET-ko poraigipa chatro chatrirang, bilsigni batpile sengengahaoba da·onan stipend-rangko man·kujaengani a·sel neng·nikanirangko chagrongna nangtokenga ine AHAM Eastern Zone-ni general secretary Aimarong Marak parakataha.
“A·dokni dingtang dingtang biaprango DIET-ko poraigipa chatro chatrirang, an·tangtangni nangchongmota lekkarangko on·mantokahaoba aro verification-rang matchotpilahaoba da·onan stipend-rangko man·tokkujaenga aro iani a·sel cholgri ong·gipa nokdangrangoni aro songadam nokadamrangoni re·bae poraienggipa chatro chatrirangde neng·nikanirangko chagrongna nangtokenga. Bang·bata chatro chatrirangan tuition fee-rangko gamna, ki·taprangko brena, hostel-ni korosrangko gamna aro songre songgabatna stipend-rangon pangchaktokpaenga indiba stipend-ko man·jaengani a·sel mitam chatro chatrirangde poraiako dontongna nangao ga·aktokengaha,” ine AHAM Eastern Zone-ni general secretary parakatenba, bangki dongenggipa stipend-rangko ta·raken chatro chatrirangna on·atchina a·dokni Chief Minister-ko mol·molataha.
