SHILLONG: Meghalaya a·dokni gital Rajya Sabha MP-ko seokna gita pu·onaniko June 18 tariko ong·atanggen aro apsan salni attamon vote-rangko changen ine Sukrobar salo, a·dokni Chief Electoral Officer (CEO) Dr BDR Tiwari parakataha.
Da·o ong·enggipa Rajya Sabha-ni MP-na dongimin somoi, June 21 tarikon bon·engahani gimin gital MP-ko seokna ia election-ko ong·atenga.
Sukrobar salo, dingtang dingtang political party-rangna election-ni kamrangko talate on·angani ja·man kobor ra·timgipa manderang baksa agangrikengon, “Meghalaya a·doko bilsigniprako ong·atenggipa Rajya Sabha election-ni bidingo talate on·na chinga da·al salni bako political party-rang baksa tom·aniko ong·atangaha. Da·o ong·enggipa Rajya Sabha MP-ni term, June 21 tarikon bon·engahani gimin June 20 tarikni gisepon election-ko ong·atna nangenga,” ine Dr Tiwari parakataha.
Rajya Sabha election-ko ong·atna Election Commission of India (ECI)-ni tik ka·gimin somoirangni gimin janapatengon, election notification ba u·iataniko June 1 tariko on·anggen ine CEO parakataha.
“Nomination-rangko on·ani bon·kamgipa tarik June 8 tarik ong·gen, nomination-rangko June 9 tariko nipilanggen aro candidate-rangni nomination-ko ra·pilani tarikara June 11 ong·gen,” ineba Dr Tiwari parakataha.
Pu·onaniko June 18 tarik pring 9:00 bajioni attam 4:00 bajiona ong·atanggen ine janapatengon, pu·onanirangko apsan salon, attam 5:00 bajioni a·bachengatgen aro election-ni kamrangko June 20 tarikna skangan matchotatgen ine CEO parakataha.
Iana skang Sukrobar pringo Election official-rang, Rajya Sabha election-ko ong·atna sienggipa Meghalaya Legislative Assembly-ona re·ange biaprangko niangaha.
Election-o susaenggipa candidate-rangna nangchongmotgipa lekkarangni giminba ua political party-rangna aro candidate-rangna agan-talatanirangko on·angaha ine CEO parakataha.
Shillong Lok Sabha by-election-ko ong·atani bidingo talate on·angskaengon, Election Commission-oni tarikrangko parakatani ja·mansa election-ni tarikko jinmana u·iatgen ine Dr Tiwari aganaha.
