SHILLONG: Meghalaya-ni ge·samangmang Rajya Sabha seat-na election ong·atna am·enggipana National People’s Party-ni gita candidate-na biming ming·kujaenga, nomine-ni bimingko official-ni gita parakatna skang party-ni dilgiparang agangrikchengna ka·dongsoenga.
Da·o dipet iani bidingo party name dake agangrika dongkuja, gitcham MLA James PK Sangma-ko candidate ong·e ra·banaba donga ine Cabinet Minister aro NPP a·gipi dilgipa Wailadmiki Shylla Sonibar salo aganaha.
Upper House seat-na mikkangchakgipa dake James PK Sangma re·chakatgenma ine sing·anganina Shylla aganchakangaha, candidate-ko parakatna ta·rake sinjetaniko on·a nangani ning·o ong·jaenga aro party-ni gita kragipa candidate-ko biming ming·anggen ine aganchakangaha.
“An·ching iarang gimikna jajrengna nangja. Iani bidingo ta·raken an·chingni dilgiparang asonge chanchigrikgen. Indiba da·onade darangko official-ni gita parakata dongkuja,” ine Shylla aganaha.
Garo Hills a·jaoni dingtang dingtang NPP legislator-rang Rajya Sabha seat-na James PK Sangma-ko dabienga, ine ua aganaha.
Legislator-rang uamang an·tangtangni namnikako aganaba donga indiba gimik dakgipa chanchianikon party-ni dilgiparang baksa chanchianggen, ine Shylla sing·anina aganchakangaha.
“Sakantian uamang an·tangtangni ku·pattianirang donga ba manderang jekon uamang Rajya Sabha MP dake nikna sikenggiparangba donga indiba anga chanchia ia chanchianiko party-ni chubatgipa gadangsa chanchigen,” ine ua aganaha.
Jensalo party chanchiani baksa re·bagen, basegimin nominee-ko electiona-na candidate-ni bimingko official-ni gita parakatgen, ine ua agandapangaha.
Meghalaya-oni Rajya Sabha seat-na election-ko June 18 tariko ong·atgen.
