Baljek Airport-ko ta·rake kulina man·a gita giljani dilgiparang bi·chaka

Tura: Manderangni nangnikani aro bebe ra·aniko dingtangte mesokanio Tura-Based Church Leaders Forum Baljek Airport-o airport-ko ta·rake kulina man·a gita apsan ku·cholsan ong·e Isolo bi·aha. Forum-ni parakatani gitade, Isolo bi·aniara, skangoni Garo Hills-ni manderangni nangnikenggipa airport-na jean sanna bannaniko tanggitik nanggiparangna, chatro chatrirangna, entrepreneur dakgiparangna aro songre songbatgiparangna dakchakanni ong·gen iana miksonge bi·aha.
Dingtangmancha da·o sorkariko rikenggipani jotton ka·enganio manderangni nangnikchongmotenggpako ra·bana Isolni pattianiko man·a Forum Isolo bi·angaha. Manderangni ru·ute sengenggipa Baljek Airport-ko on·a ku·rachakgipako ta·rake bimang ong·atna gitalgipa ka·tonganiko tom·bagipa manderango nikaha.  “Airport-na bi·asan ong·ja ian bakrimanina, cholrangna aro Garo Hills-ni mikkangchina ka·donganina bi·aha,” ine Forum agandapangaha.