SHILLONG: Kam ka·soenggipa skigiparangna Teachers Eligibility Test (TET) pass ka·ani somoiko Supreme Court ra·dodapataha ine Meghalaya Samagre Shiksha Abhiyan School Association (MSSASA) parakataha.
MSSASA-ni president Aristotle Rymbai-ni kobor ra·timgiparangna parakatani gitade, TET-ko pass ka·na gita Supreme Court, iana skangde bilsignikosan on·aiahachim indiba da·o bilsi gittamona ra·dodapatahani gimin kam ka·soenggipa skigiparang, 2028 bilsini August 31 tarikona, TET-ko pass ka·na somoi man·gnok.
Skigiparangna TET pass ka·na gita bilsigni somoiko on·e 2025 bilsini September 1 tariko Supreme Court-ni rai on·aniko skigiparang jegale kachario badi ka·doani ja·man skigiparangna TET pass ka·ani somoiko Supreme Court ra·dodapataha ine Rymbai parakataha.
Supreme Court-ni skanggipa rai on·aniko jegale, a·song gimikni skigiparang, 2025 bilsini October 24 tariko, Supreme Court-o badi ka·pangpilaha aro uandaken, ia 2026 bilsini May 13 aro May 29 tariko hearing-ko dakangani ja·man, skigiparangna TET pass ka·ani somoiko kachari ra·dodapataha ineba MSSASA-ni president parakataha.
Ia gital u·iataniko on·angahaoba 2025 bilsio rai on·gimin gitan, Right to Education (RTE) Act-ko ra·gatna skang kamo rimnapa man·gipa skigiparangko aro kamoni neng·takna bilsi bonga dongkuenggipa skigiparang pilakkon TET pass ka·china Supreme Court ge·etaniko on·angaha ine Rymbai aganaha.
Re·baenggipa bilsi gittamni gisepo, kam ka·soenggipa skigiparang, TET-ko sena gita komibeoba changgittam cholko man·china kachari, pilak a·dok sorkarirangnan, komibeoba bilsio changgni dake TET-ko ra·china ge·etaniko on·angaha ineba MSSASA-ni president parakataha.
