SHILLONG: Re·baenggipa 2028 bilsini Assembly election-na skang, party-ni bang·bata dilgiparangan gipin party-rango napskana siengaha ine jangbingbanganiko Meghalaya Trinamool Congress (TMC)-ni president aro Opposition MLA Charles Pyngrope jegalatenba, da·o dipet TMC, a·doko kam ka·kuenga ine parakataha.
TMC-ni bang·bata dilgiparangan, gipin political party-rango napskana miksongtokenga ine jangbingbangenggiparangna aganchakaniko on·angengon, ian chanchichipe agananisan ong·aia aro kakket ong·ja ine Pyngrope parakataha.
Meghalaya a·doko TMC, a·bachengo gitan kamrangko ka·kuenga aro ma·mongni dilgiparang baksa agangrikjringkuenga ineba Pyngrope a·kangataha.
“Party-ni office, da·oba dongkuenga aro chinga da·oba ma·mongo party-ko dilgiparang baksa agangrikjringkuenga. A·doko TMC-ni office, salantian kamrangko ka·enga,” ine TMC-ni state president aganaha.
Meghalaya a·doko seokako man·gipa party-ni dilgiparang, TMC-ni membor-rangan ong·kuenga aro da·o dipet dilgiparangni ong·katgrimna miksonganirangko mesoka dongkuja ineba Pyngrope parakataha.
Pyngrope-ni aganani gitade, Shillong Lok Sabha by-election-o susana aro uandakgipa dingtang dingtang kamrangni giminba a·dokni TMC, ma·mongni dilgiparang baksa agangrikaha.
