TURA: South Garo Hills a·jani Chokpot Higher Secondary skulo classroom aro asongchakani bench-rang chu·ongjae, Class 12-o poraienggipa chatro chatrirang, a·arangosa asonge skie ra·na nangengani a·sel neng·nikanirangko chagrongna nangtokenga ine Garo Students Union (GSU) Chokpot regional unit parakataha.
GSU Chokpot regional unit-ni president Jish A Sangma-ni u·iatani gitade, Chokpot Higher Secondary skulo poraienggipa chatro chatrirangni maini a·sel iandakgipa neng·nikanirangko chagrongna nangenga ine skulona re·ange principal-o sing·sandion, higher secondary section-ni class ge·saon sak 280-mangni gita chatro chatrirang donga aro chatro chatrirangko morning aro day shift-o sualna gitaba skigiparang chu·ongskajaenga ine una parakataha.
“Skulo chalaienggipa principal-ni chingna u·iatani gitade, classroom-o asongchakani biaprang chu·ongjaengani gimin uamang bench aro desk-rangkode order ka·ataha indiba chatro chatrirangna chu·onga gitade man·kujanaba gnang. Class ge·saon sak 280-mangni gita chatro chatrirang donga aro skulo morning aro day shift-ko kulina gitaba skigiparang chu·ongskajaenga ine skulni principal, chingna aganataha,” ine GSU Chokpot regional unit-ni president parakataha.
Da·o dipet ia skulna, classroom aro asongchakani biaprangna sorkarini gita tangka paisarangko dakchake on·ata dongkujaenga ine janapatengon, skulo poraienggipa chatro chatrirang, maming neng·nikani gri an·tangtangni lesson-rangko skie ra·na man·na gita ia skulna pilak nanganirangko dakchake on·atchina GSU Chokpot regional unit, a·dok sorkariko didiataha.
