Kamrangko namdapatchina official-rangko ge·etanga
SHILLONG: Union Education Ministry-ni Perfomance Grading Index (PGI)-o Meghalaya a·dok bon·kamgipa biapko man·ahani gimin Budbar salo, a·dokni Chief Minister Conrad K Sangma, Education Department baksa tom·aniko ong·atangaha aro ia tom·anio ua, a·doko lekka porako namdapatna gita a·bachengatgipa dingtang dingtang kamrangkoba niangjolaha.
Ia tom·anio Education department-ni official-rang, PGI-na ra·gipa dingtang dingtang cholrangko mesoke on·angengon, chatro chatrirangni skie ra·aniko namdapatna, skul nokrangko namdapatna, vocational education-ko apalbatatna aro data management system-ko namdapatna dingtang dingtang ja·kurangko de·chakataha ine talate on·angaha.
A·doko bi·sa sakantian, namgipa lekka porako ra·na man·na gita Meghalaya sorkari, kamrangko namdapatna kam ka·enga ine ia tom·anio Chief Minister, gisik ra·attaianiko on·angaha.
Meghalaya a·doko lak 30-mangni gita songdongenggipa manderangna dam 14,600-mangni gita skulrang, lekka porako on·engani gimin ian diltubatsranggipa biaprangoba lekka porako ra·na gita cholko on·ani ong·enga ine ia tom·anio official-rang mesoke on·angaha.
Bi·sarangni skie ra·aniko namdapatna, skigiparangni namgnina, skul nokrangko rikna, computer-rangko skie on·na aro chatro chatrirangna dingtang dingtang cholrangchi dakchakaniko on·na tangka paisarangko koros ka·an baksana lekka porani kamrangko namdapatna sorkari, dingtang dingtang ja·kurangko de·aha ineba official-rang parakataha.
Bi·sarangni skie ra·anio biteko nikna man·anian PGI-na ra·anio mongsonggipa bak ong·ani gimin iako namdapatanian sorkarini mongsonggipa daito ong·enga ineba ia tom·anio parakangaha.
Skul nokrangko namdapatna ka·enggipa kamrangni gimin nipilangengon, Meghalaya a·dokni pilak skulrangon science laboratory, ICT, smart classroom, library, me·su bagan, mikka chi chimongchakani, ringani chi aro solar power-rangko on·na kam ka·enga ine official-rang parakataha.
A·jatangtangon kamrangko ka·na nangengani gimin a·ja ge·antini deputy commissioner aro district administration-rangko, Education department baksa nangrime, lekka porako namdapatna gita kam ka·china Chief Minister ge·etangaha.
Ia tom·anio, vocational education, Mid-Day Meal program, me·chikrangni skulrango sanitary pad vending machine-rangko donani aro dingtang dingtang skie ra·ani cholrangkoba Chief Minister nipilangaha.
Kam mingantikon name nirokchina aro kolgapgijanirang donggenchimode uarangko ta·raken namdapatchina gitaba ia tom·anio a·dokni Chief Minister, Education department-ko ge·etangaha. Skulrangko namdapatna gita ua pilak nanga dakchakanirangko on·naba ku·rachakangaha.
Ia tom·anio Chief Minister, official-rangna aganangengon, batanggimin bilsirangonin a·dok sorkari, lekka porani kamrango dingtanganiko ra·bana pilakni gitan ja·kurangko de·ahani gimin ian bon·changgijagipa dingtanganinasa pangchakaniko songani gita ong·enga ine janapatenba, da·o sorkarini minggipin nisande skul ge·antion nambatsranggipa lekka porako on·anian ong·enga ine parakataha.
Mikkangchi lekka porani kamrangko nipiltaianio Meghalaya a·dokni chu·sokaniko mesokna gita pilak kamrangkon nambate ka·chinaba Chief Minister ge·etangaha.
