TURA: Garo Hills-o saksa ki·tap serakgipa Dilip R Marak-ni ‘Love at First Sight’ ingipa ki·tapko Sukrobar salo, A·chik Literature Society (ALS)-ni Secretary Dr Crystal Cornelious D Marak-ni jakchi, ki·tap senokgipani noko oprake on·angaha.
Ia ki·tapko oprakanio, dingtang dingtang skigiparang, ki·tap segiparang, ki·tap senokgipani ripengskarang aro Nengminja baksana Rema Maharini membor-rangba dongpae bak ra·angaha.
Ia ki·tapko oprake on·angani somoio ALS-ni Secretary Dr Marak, tom·anio bak ra·giparangna aganprakengon, iandakgipa ki·taprangko seaniara, senokgiparangni janggi tangani giminsan ong·aigija, uamangni somoirango ong·anggimin obostarangni giminba ma·sie ra·na dakchaka ine aganaha.
Ki·tap senokgipana an·tangni namgipa skaniko on·angengon, ia ki·tapko chapa ka·anichi sakgipinrangnaba an·tangtangni janggi tangani gimin sena gita didianiko on·gen ine Dr Marak, an·tangni ka·dongchakenganiko parakangaha. Ia ki·tapko Garo ku·sikchi pe·genchimode ian A·chik sea jotaniko tang·doatna dakchakaniko on·an baksana A·chikkuko dal·roroatanio aro ripinge rakkianioba on·gilani ong·gen ineba Dr Marak aganaha.
Ia ki·tapko oprake on·anio dongpae bak ra·anggipa gipin manderangara, Tura Government Girls Higher Secondary School-ni Principal Sengjrang N Sangma, Tura Baptist Mondolini Pamong Rev Nicky N Sangma aro gipinrang ong·a.
Ia tom·aniko, Andhra Pradesh a·dokni Vaddeswaram-o donggipa KL University-ni English Department-o Assistant Professor ong·e kam ka·enggipa Dr Tangme Marchina N Sangma dilangskaaha.
