TURA: West Garo Hills a·jani Selsella Community Health Centre (CHC)-o Intensive Care Unit (ICU) dongjani a·sel bilongbate sagiparangko sanna bananio neng·nikanirangko chagrongna nangtokenga ine Selsella jolo dingtang dingtang dolrangni nangrime bikotgipa All Selsella NGOs Alliance (ASNA) parakatenba, Selsella jolrango songdongenggipa manderangni namgnina Selsella CHC-o ta·raken ICU-ko kulie on·china a·dok sorkariko didiataha.
Ia All Selsella NGOs Alliance-o Selsella-ni GSU, FKJGP, ADE, ASWA, NGCO aro ANYO dolrang bakrimengachim ine nikna man·a.
Iani bidingo Health Services (MI)-ni Director-na sedoatengon, Selsella jolrango aro sima jolrango songdongenggipa bang·bea manderangna ia CHC, sanna bananirangko on·engoba da·onan, bilongbate saenggipa manderangko sanchakna gita ICU dongkujani a·sel manderang, neng·nikanirangko chagrongna nangtokenga ine ASNA-ni chairman HN Sangma parakataha.
“Selsella CHC-o ICU dongjani a·selan bilonge sagiparangko Selsella jolni manderang, Tura aro gipin dal·kala biaprangonasa ra·ange sanna bananirangko on·na nangenga. Bilongbate sagiparangna iandake ta·rake sanna bananirangko on·na man·rongjani a·selan sagiparangna kenchakna nanganirangba ong·enga aro sagipa mandeni nokdangna korosni gitaba batenga,” ine Selsella-ni NGO-rang parakatenba, Selsella CHC-o ta·raken ICU-ko kulie on·china Health Services (MI)-ni Director-ko didiataha.
