Balachanda-Rajabala jolrango bijoliko name man·jaenga ine badi ka·a

TURA: West Garo Hills a·jani Balachanda-Rajabala jolrango, salantian bijoli sisimengani a·sel, voltage-rang komiengani a·sel aro bijolini bill-rangko nangana bate sokatengani a·sel bijoli jakkalenggipa manderang neng·nikanirangko chagrongna nangtokenga ine Sombar salo, songni Nokmarang, dingtang dingtang dolrang baksa MePDCL Selsella Technical Branch-ni Sub-Division Officer-na seachi badi ka·doangenba, ia jolrango bijoliko nambate on·china dabiangaha.
MePDCL Selsella Technical Branch-ni SDO-na sedoatgipa chittio jolni Nokmarang aro dingtang dingtang dolrangni parakatani gitade, Balachanda, Rajabala, Hallidayganj aro samba jolrango donggipa dingtang dingtang songrango salon chang 30-na batpile bijoli sirongenga aro voltage chu·ongjani a·selba bijoli jakkalenggipa manderang neng·nikanirangko chagrongna nangtokenga.
Ia jolrango, 5000 kVA feeder transformer-chian bijoliko ge 140-mangni gita distribution transformer-rangna on·skaenga ine janapatengon, ia transformer-oniko nangana bate bijoli on·engani a·sel amchakjae, bijoli sirongenga ine jolni Nokmarang aro dingtang dingtang NGO-rang parakataha.
Namabilla, Haripur aro Bhaitbari jolrangna dingtang 5000 kVA feeder transformer-ko jakkalenga aro ia transformer-onikode ge 65 distribution transformer-rangnasan on·engani gimin bijoliko nambate on·na man·enga ineba Balachanda aro Rajabala jolo songdongenggipa manderang parakataha aro ia feeder transformer ge·gnini gisepo bijoli on·anio dingtanggrikaniko nienba, ta·raken iako namdapatchina MePDCL Selsella Technical Branch-ni SDO-ko didiataha.
Phulbari Electrical Sub-division-ko chalaienggipa Sai Computers Limited company-ni kamrangna suk ong·gijaniko parakatskaengon, ia jolrango bijoli jakkalenggipa manderang, maming u·iatsamsoani gri bijoli bill-rango tang·doaniko nikna man·enga aro ia company-ni manderang, songni nokni dilgiparangna u·iatchenggija, songo noko bijoli jakkalenggipa manderangoniko dairangko ra·enga ine songni Nokmarang aro dingtang dingtang dolrang matnangataha.
Ia kamrangko sal 10-ni gisepon namdapatenba, Balachanda-Rajabala jolni dilgiparangna u·iatpilchina didiatengon, bijoli on·aniko namdapatna man·jagenchimode, ia jolrango songdongenggipa manderang, jinma jegale jingjengatanirangko dakna draatako man·naba gnang ine songni Nokmarang aro dingtang dingtang dolrang mikrakataniko on·angaha.