Secretariat-ona jinma re·jomange jingjengatna manchienggiparangko NPP sing·doa

SHILLONG: Secretariat-ona jinma re·jomange, jingjengatna manchienggipa dolrangko National People’s Party (NPP)-ni saksa dilgipa aro a·dokni gitcham cabinet minister Ampareen Lyngdoh sing·doatenba, iandake a·doko songdongenggipa manderangko jingjengatanirango bak ra·china didianiara, so·sojengjeng ong·anirangko aro manderangni tom·tome songdong a·chaako golmal ong·atani cholrang donga ine mikrakataniko on·angaha.
Iani bidingo ua darang political party-koba biming minge matnangjagenchimoba, sorkarini kosako jegalani aro jingjengatanirangko dakanio, ramram manderangko bak ong·atpana jotton ka·engani gimin ua, ia jingjengataniko ong·atna manchienggipa manderangko sing·doataha.
Secretariat-ona jinma re·jomaniko ong·atna manderangko ku·mongengani gimin sing·doatskaengon, jinma tom·bimonganirangko ong·atani aro sorkarini kosako jegalna manderangko rimchimongna jotton ka·anio dingtanggrikanirang donga ine Lyngdoh parakataha.
“Manderang jinma tom·bimonganio ba jinma chanchirimanirango maming ong·gijani dongja. Manderang an·tangtangni chanchianirangko mesokna bilrang donga. Indiba Secretariat-ona re·jomange, sorkari office-rangko chadrapna manderangko didianide manderangni gisepon so·sojengjeng ong·aniko ra·baani cholrang donga. Iandake jingjengatengmiting somoio maibakae a·selrang ong·e, dosgri manderangsa sina ba saknaanirangko man·na nanggenchimode sawa daiko ra·gen?” ine Lyngdoh sing·doangaha.
Meghalaya aro Assam a·dokni simarango ong·enggipa golmalrangni bidingo iandake manderangko jingjengatna didiengani gimin ua an·tangni suk ong·nikgijaniko parakaha aro iandake jingjengatanirangchide ia neng·nikaniko namatna man·jawa ine talataniko on·angaha.
“Secretariat-ona re·jomangaiachide a·dok damgnini simarango ong·enggipa obostarangko namatna man·jawa. Iani bidingo a·dok damgnini chief minister-rang, sorkari committee-rang aro ma·mong sorkari baksa chanchirimanirangko nanga,” ine ua aganaha.
Secretariat-o jingjengataianichi ia neng·nikaniko namatna man·genchimode basakonin ia neng·nikaniko sorkari namatenggnokchim ineba Lyngdoh aganaha.
Dilgiparangko manderangsa, an·tangtangni nanganirangko chu·sokate on·na seokaha ineba ua talataniko on·angaha.
“Manderang an·chingko uamangni pal ku·rang on·china aro kam ka·chinasa seokaha. Uamangni nanganirangko sorkariona ra·anganide an·chingni daitoan ong·a. Dilgiparangko ka·china on·gipa kamko maini gimin manderangko Secretariat-ona re·jomate ka·atna nangenga?” ine Lyngdoh sing·doataha.
Iandakgipa kamrangna jingjengatanirango so·sojengjeng ong·on, pangnan chadamberangsa rim·ako man·rongbata ine iandakgipa jingjengatanirango dedrangrangni bak ra·anirangko name nirokchina gita ua, ma·a paarangko didiataha.
“Ma·a paarang namen simsakna nangchongmota maina iandakgipa jingjengatanirango bak ra·anichi chadamberang, saknaanirangko man·na ama aro obostarang namjabatgenchimode, be·enni gita cholgri ong·anirangko chagrongna nangani cholrangba dongaia. An·ching iandakgipa obostarangko a·gilsakni bang·a biaprangon nikna man·aha,” ine ua aganaha.
Manipur a·doko ong·enggipa obostarangni gimin toe janapatengon, Meghalaya a·dokba iandakgipa obostarangko chagrongna nangjana gita namen simsakna nangchongmotenga ine NPP-ni dilgipa aganaha.
“Manipur-o mai obosta ong·aha name niate nibo. An·ching Meghalaya-oba apsan dakgipa obostako chagrongna nangnikengama? An·ching an·chingni bazaar antirangko aro skulrango chipe donatako nangnikengama? Manipur-o iandakgipa neng·nikanirangchi manderang, ru·uta bilsirangna saknaanirangko chakna nangengaha, uni gimin an·ching iarangko skie ra·na nangchongmota,” ine Lyngdoh aganaha.
Bangladesh-o ong·anggipa obostani giminba ua janapataha aro maikai dikdiksa jingjengatanichin rang·san golmalrang dal·na man·a, uarangni bidingo mikrakatanikoba on·angaha.