SWKH-o chalaienggipa coke karkanarangko name nipiltaichina kachari ge·eta

SHILLONG: South West Khasi Hills a·jao niam gri a·ningni gamrangko bikotenga ine matnanganirangko man·ahani gimin a·jao chalaienggipa pilak coke karkana ba koela so·a karkanarangko name nipiltaichina gita Supreme Court, Meghalaya High Cpurt aro National Green Tribunal (NGT)-ni ge·etanirangko nirokenggipa Single Member Committee, ge·etaniko on·angaha.
Ia Committee-ni chang 38-gipa Interim Report-o janapani gitade, Nonghyllam sambao donggipa Nongumsur songo, niam gri koelarangko bikotenga ine ia bilsini May 5 tariko matnanganirangko man·soaha. Iani bidingo digital news portal-oba, May-ni 3 tariko, matnange seanirangko nikna man·aha.
Matnanganirangko man·ani ja·man, iani bidingo sandirokchina ia Committee, Meghalaya-ni Assistant Inspector General of Police (L&O)-na ge·etaniko on·angaha. Ge·etaniko man·e, Nonghyllam Police Station-ni officer-in-charge, video-o mesokgipa biaprangona re·ange, am·sandianirangko dakangaha.
ani bidingo, South West Garo Hills a·jani Superintendent of Police (SP)-ni report-ko on·ani gitade, ua biapo koela bikotdaldalni chinrangko man·ejaha aro ia koela a·kolo mikkachirangan gapani gimin koela bikotna gita cholrang dongbrejachim. Ia biapo, gitcham maram cha·gimin crane-kode nikaha aro ia crane-ko ia biapo baditaba bilsirangna jakkalahachim ine ma·sina man·aha.
Ia koela a·damni bidingo sandirokangkuon, viral ong·gipa video-o mesoka gita ia biapo koela dane donanirang, dumper truck-rang aro excavator-rang dongjachim ineba nikna man·aha. Official-rang, ia biaponiko koela salruraani gital chinrang, jekai tyre-ni chin, garirango koela gatani ba koela chimongani biaprangko nikna man·jaha ineba report-o parakaha. Ia koela a·damona dakanggipa ramarangba namen namsrangjahani gimin dal·dalgipa garirang re·na man·jawachim ineba report-o parakaha.
Iandake sandiroke man·anio pangchake ia Committee, social media-o aro news channel-rango watgipa video-rangara gitchamsa aro da·o biapni kri ong·ja ine parakataha.
Cherragaon Port gita niam gri koelarangko salangengaa ine matnanganirangnaba maming chinrangko sakkina man·jaha ineba ia Committee parakataha. Sandirokanio man·ani gitade, ia port gita Coal India Limited (CIL)-ni dakkie galgipa koelarangkosa, nanggipa lekkarang baksa salaha ine Committee parakaha.
Indake ong·genchimoba, South West Khasi Hills a·jani coke karkanarango koelarangko jakkalengani giminsa ia Committee, jajrengchakaniko parakataha. Ia karkanarangni lekkarangko aro record-rangko District administration name am·sandienga ine SP report-ko on·ahaon, indita matnanganirangko man·ani ja·manba ia karkanarangona re·ange changsaba sandirokanirangko dakajaha ine ia Committee parakatskaaha.
Ia pilak coke karkanarangona District Civil aro Police Administration re·ang, banoni koelarangko jakkalenga aro badita koelarangko man·enga, uarangni gimin sandirokchina gita ia Committee, ku·pattianikoba on·ataha.