TURA: Barengapara Civil Sub-divisional-ni ning·o donggipa Rimrangpara oni Josipara ona PMGSY ramako tarina kam ka·na rimbagipa rurirango nanggipa lekka pancha dongtokja ine nikna man·e June 18 tariko West Garo Hills a·jani Labour Inspector Officer-na Sairill D Marak badi ka·doanga.
Badi ka·gipao janapani gita, MP Agarwal -ni Manager Nobin Chetry Rimrangpara-Josipara PMGSY ramako tarina kam ka·atna a·palchini kam ka·giparangko nanggipa lekkarangko chu·onga gita tarie ong·gen ine okamataha. Lekkarangko chu·onga gita tarimanaha ine tol·e kam ka·giparangko rimbaaha. Nobin chetry kam ka·giparangko rimbana labour licence-ko aro Songni Nokmana koborko on·a nanga ine antangan u·igenchimoba tol·e rimbaaha aro rimbaani ja·manoba songni Nokmana koborko on·jaha.
Sandie nion sak 14 kam ka·giparangoni sak 9 baksade lekkarang dongja ine nikna man·aha.
Garo Hills-ni dingtang dingtang bakrango jekai Dalu joloba Non-tribal-rang kam ka·enga ine labour Official-na u·iataha aro ta·raken Department-ni gita am·sandianiko dakchina jolni manderang Department-ko didiaha.
