AMPATI: South West Garo Hills a·jani Lutubari songo, bilsigni ong·na sipile ramako tarichipgija donengani a·sel songni manderang aro ramako re·ruraenggipa manderang neng·nikanirangko chagrongna nangtokenga ine jolo songdongenggipa manderang parakataha.
Koborko on·ani gitade, ia ramako tarina ine bilsignina skangan, ia ramani black topping-rangko ra·gale galahachim indiba da·o bilsigni ong·na sipilengoba ia ramako tarichipgija donengani a·sel ia rama namjabatroroe, songni manderang aro ramako salanti re·ruraenggipa manderang neng·nikanirangko man·tokengaha.
“Ia ramako bilsigni ong·na sipile tarichipkujaengani a·sel, da·o gita wachini somoirangode rama gimikan a·dubekrara dake, re·ruraenggipa manderangna kenchakna nangani ong·enga,” ine jolo songdongenggipa manderang parakataha.
Lutubari jolrangosan ong·aigija, Garobadha-oni Betasing-ona dakbagipa ramarangba a·kolrara dake namsrangjahani a·sel neng·nikanirangko chagrongna nangtokenga ineba kobor on·timgiparang parakataha.
“Ia ramako chatro chatrirang, game ge·e cha·giparang aro pilakan salantian re·ruraenga indiba rama gimikan a·kolrara dake, gari gorarangna namen neng·nikaniko on·enga,” ine jolo songdongenggipa manderang parakataha.
Jolo songdongenggipa manderangni u·iatani gitade, ia ramako tarichipgija donengani gimin changni changni sorkari official-rangna u·iatahachim indiba da·onan ia ramako tarina gita a·bachengkujaenga.
“Da·o wachini somoi sokahani gimin salanti kam nangana re·ruraenggipa manderang neng·nikanirangko chagrongna nangtokenga, uni gimin ia ramako ta·raken tarina a·bachengatchina chinga sorkariko didienga,” ine jolo songdongenggipa manderang parakataha.
