GHADC-o ‘Autonomous’ kattako ra·gala ine matnanganina EC talata

TURA: Garo Hills Autonomous District Council (GHADC)-ni nangchongmotgipa lekkarang aro logo-o ‘Autonomous’ kattako ra·gala ine Tura-ni MDC aro Bharatiya Janata Party (BJP)-ni state vice president Bernard N Marak baksana gipinrangba matnangtokahani gimin ian gipin biaprango lekkarangko chapa ka·atani a·selsa sesretanirang ong·ahakon aro GHADC-ni lekkarango ‘Autonomous’ kattako uamang maming dakeba ra·galna miksonganirang dongja ine Bristibar salo, GHADC-ni Executive Membor aro Garo Hills United Alliance (GHUA)-na ku·wattimgipa Cherak W Momin talataniko on·angaha.
GHADC-ni nangchongmotgipa lekkarang aro logo-rango ‘Autonomous’ kattako ra·galaniara, gitcham Executive Committee-rangni Garo Hills District Council (GHDC) aro Garo District Council (GDC) ine seaniko ja·rikbagipa apsan kamkon dakgualani gita ong·enga aro ian GHADC-ni bil aro jakgitelaniko onatani ba ra·ongalani gita ong·enga ine adita salrangna skangsan Tura-ni MDC Bernard Marak parakatahachim.
Tura MDC-ni matnangatani ja·man, South Garo Hills a·jani social activist-ba iako jegalanio chakpaaniko parakataha aro ‘Autonomous’ katta gride GHADC-ara, wagam gri gitasan ong·e, Tribal-rangni bilrangko warachakanio chu·sokgipa ong·na man·jawa ine parakataha.
Iandake matnanganirangna aganchakaniko on·angskaengon, Executive Committee-ni gita am·sandie man·ani gitade, skang somoirango GHADC-o printing press dongjani a·sel gipin biaprangosa lekkarangko chapa ka·na nangao ga·aka aro gipin biaprango chapa ka·ani a·selsa mitam kattarangko sesretahakon ine chanchichipanirang ong·kataha ine GHADC-ni EM Momin parakataha.
“Indiba GHADC-ni nangchongmotgipa lekkarango ‘Autonomous’ kattako ra·galna ba gimaatna sike da·alo Executive Committee-ko chalaienggiparang, iako dakenga ong·ja,” ine Momin parakataha.
GHADC-ni logo-o ‘Autonomous’ katta dongjani gimin talataniko on·angskaengon, “GHADC mikkangon dal·prete ‘Garo Hills Autonomous District Council’ ine see donaha indiba logo-ode ‘Autonomous’ katta dongskaja. Iara skangonin GHADC-ko GDC ine seng·sote seani ba aganani a·sel ranta ong·baani gimin ong·akon ine Executive Committee chanchichipenga,” ine GHUA-na ku·wattimgipa Momin parakataha.
Autonomous ba jakgitele sason ka·na bilko on·ahani gimin iako darangba bon·atna aro gimaatna skani dongjawa aro gimajawa ine janapangskaengon, jerangon da·alo sesretanirang dongachim iako batanggimin bilsibongao darang MDC-ba nikna gualahakon indiba da·alo on·dapgimin somoio ia kattarangko nikaha aro ia segualanirangko da·o taridapna gita Executive Committee tik ka·aha ineba Momin parakataha.
“Uni gimin je form-rangon ‘Autonomous’ katta dongjachim, uko chinga chu·gimik dontongatna ge·etaniko on·aha aro GHADC-o printing press-koba a·bachengatpilna gita printing machine-koba ra·aha aro a·bachengatengaha. Segualanirangko nipiltaina gita ia EC ja·kurangko de·anggen,” ine GHADC-ni EM aro GHUA-na ku·wattimgipa Momin, ku·rachakaniko on·angaha.