SHILLONG: Arunachal Pradesh-o chi bannio am·sandianiko dakenga sal 4 gapaha. Bilsi 30 ong·gipa tra Ballari Marak (ba Olyn Synkly)-ni manggisiko man·aha. Sigipa mandeni manggisiko songtangni manderang Ballari Marak ine ma·siaha. Ballari Marak-ni pagipa Shangain Synkli sagi aro uni ma·gipako Willina K Marak ong·a uamang Meghalaya Ri-Bhoi district-ni Bhoirymbong, Lumpshoping songoni ong·a.
NEEPCO gitimoni sakgittam gimakuenggiparang bilsi 13 ong·gipa Elesh Marak, bilsi 46 ong·gipa Tao Anjina aro Sourav Kumar uamangko nikujaenganina SDRF aro Keyl Panyor police dolrang apsan nangrime am·sandikkuenga.
Potin aro Kimin ramarango a·a rurongdapani a·sel ramarangko rongtalatenga. Pitapool aro Potin ramarang baksana a·a rurongdapgipa biaprango police sipairangko donangaha, jedakode manderangni naljokanina, ramarango garirangko watrurana aro a·a rurongdapgiparangko rongtalatna donangaha.
Nosto ong·gipa ramarangko taripilani kamrangko ka·angkuenga. Man·a dipet senggnang ta·rake songre songgabatpilna engineering-ni bosturangko, nanggitikgipa garirangko, nangchongmotgipa jakkalani bosturangko on·angna skanggipa dakna nanggnigipa kam dake donaha.
