WILLIAMNAGAR: Meghalaya a·dokoba electoral roll-rangko Special Intensive Revision (SIR) dakna a·bachengatahani gimin East Garo Hills a·jani dingtang dingtang dolrangna agan-talataniko on·na gita Mongolbar salo, SIR-ni gittamgipa bakni bidingo awareness program-ko Williamnagar Circuit House-o ong·atangaha.
Ia tom·anio East Garo Hills a·jani Deputy Commissioner RP Marak, rimchaksoani kattarangko aganangengon, Special Intensive Revision-ni bidingo agan-talatanirangko on·angenba, ia kamko name chu·sokgipa ong·atna pilakkon bakrimchina didiangaha.
Special Intensive Revision-ko dakanio gisik nange bak ra·china aro election official-rangni kamrango dakchakanirangko on·china gitaba ua East Garo Hills a·jao songdongenggipa manderangko aro dingtang dingtang dolrangko didiangaha.
Ia program-ko ong·atanio, East Garo Hills a·jani Additional Deputy Commissioner (Election) Dimserita A Sangma-ba aganprakengon, nokantiona booth level officer (BLO)-rangni re·e electoral roll-rangko nipilanbi, draft electoral roll-rangko chapa ka·ani, a·kangna aro jegalna dongimin somoi aro bon·kamgipa electoral roll-rangko chapa ka·ani bidingo jinmana agan-talate on·angaha.
Ia Special Intensive Revision-ko dakani miksonganiara, bilsi sokgimin manderangko electoral roll-rango segatna, sesretanirangko taridapna, biap damgnio biming donggiparangko den·galna aro sigimin manderangni bimingrangko electoral roll-rangoniko den·galna miksonge ong·atanian ong·enga ineba ua aganaha.
Ia program-ko ong·atanio, dingtang dingtang NGO-rang, CSO-rang, self help group (SHG)-rang, dingtang dingtang skul aro college-ni principal aro headmaster-rang, ma·giparangni dolrang, aro jolo songdongenggipa manderangba bak ra·angtokaha.
