Pine Mount School-ni gital Boarding Building-ko CM-ni jakchi nokdonggae on·a

SHILLONG: Shillong songjinmani Pine Mount School-o gital rikgipa Boarding Building ba hostel nokko Bristibar salo, a·dokni Chief Minister Conrad K Sangma, nokdonggae on·angaha aro gital hostel-ko nokdonggaanio, a·dokni Education Minister Lahkmen Rymbui-ba dongpae bak ra·angaha.
Ia skulni gital hostel-ko nokdonggae on·anganio a·dokni Chief Minister, jinmana aganprakangengon, 2022 bilsini October jao ia skulona an·tangni re·angako gisik ra·atpilenba, ua somoio ia skulni hostel-o dongenggipa chatrirang, nok namjani gimin badi ka·anirangko man·e, ia skulna ua gital hostel-ko rike on·na ku·rachakaha aro da·alo an·tangni ku·rachakako chu·sokate on·na man·ahani gimin kusiniko man·aha ine parakataha.
2022 bilsio unbaksa agangrikgipa apsan chatrirangni mikkangrango da·alo kusiniko nike ua gisiktango namen chu·ongnikaniko man·aha ineba Chief Minister aganaha.
Lekka porani kamrango sorkarini apalbate niksamsoanirangko janapangkuengon, lekka porani kamrangan a·dok sorkarina mongsongbatgipa daitorangoni mingsa ong·kuenga aro chatro chatrirangni poraianirango chu·sokaniko ra·bana gita skul nokrangko nambatatna raken kamko ka·enga ine Chief Minister aganaha.
Walsanode dingtanganiko ra·bana man·ja ine janapatengon, manderangni nanganirangko chu·sokatna gita on·kanganiko aro krenge kam ka·anikoba nanga ine Sangma aganaha.
Ia tom·bimonganio a·dokni Chief Minister, chatrirangni somoi nikanio rongtal an·talaniko aro mikkimko rakkiangna miksonge a·bachengatenggipa ‘She Thrives’ sanitary pad vending machine-koba oprake on·angjolaha.
Chanchiani bewal aro ma·siani dongna nangchongmotani gimin janapangengon, ia ‘She Thrives’ program-ara chatrirangna sanitary pad-rangko on·na miksonganisan ong·ja indiba chatrirangni gisepo ka·donganiko aro dakchakaniko on·aniba ong·enga ine Chief Minister aganaha.
Bi·sa sakantinan naljokgipa samtangtangko ong·atna gita chatro chatrirang, skigiparang aro songsalni gisepo mandeni mikkimko mande ra·na nangani giminba Sangma aganangaha.
Ia tom·anio a·dokni Chief Minister, skulo poraienggipa chatrirang baksa agan-golpogrikangengon, kam ka·e cha·ani chol aro chadamberangni mikkangchi janggi tangani cholrangni bidingo sing·anirangnaba agan-talatanirangko on·angaha. Sorkari kamrangko gimikanade tikate on·na man·jani gimin sorkari, bading chiwalani aro private kamrango janggi tangani cholrangko on·skana gita dingtang dingtang niam aro program-rangko ra·gatenga ineba Chief Minister talate on·aha.
An·tangtangni miksonganirangko chu·sokgipa ong·atna gita bimchipe aro ka·donge poraichina gitaba Chief Minister, skulni chatrirangna ku·pattianiko on·angaha.