PHULBARI: West Garo Hills a·jani Tikrikilla Police Station ning·o donggipa Bhangarpar songo, mande saksa, an·tangni jikgipako tangkana sasti on·enba, ja·mano so·ote galaha ine matnangataha.
Police official-rangni u·iatani gitade, ia a·sel ong·ani Budbar walo ong·aha aro ia a·selna matnangako man·gipa Saddam Hussain, an·tangni ma·a paa baksa da·o kate dongenga.
Koborko man·soani ja·man police-rang, a·sel ong·gipa biapona re·angon, uano sigimin me·chik baksa uni nosarigipa dongsoengachim indiba gipinrangde, ua somoio ua biaponi kattokaha.
Ia a·selni bidingo, so·otako man·gipa Salema Khatun-ni adatang Chandmamuth Sh, Bristibar pringo, Bogularbhita outpost-ona re·ange badi ka·eaha.
Ia a·selni bidingo police-rang sing·sandion, ia me·chikko, uni segipa, me·chikni ma·a paaoniko tangka bi·atchina dabie sasti on·rongachim ine sianggipa me·chikni ma·drangrang parakaha.
Ja·mano ia me·chikko, uni segipa aro segipani ma·drangrang Assam-ni hospital-ona rimangaha indiba ua siaha ine ma·siani ja·man, an·tangtangko rim·a man·na kenenba ua biaponi kataha ine kobor on·aha.
Ia a·selni bidingo police-rang, mokordoma ka·enba, ning·tubate sandirokna a·bachengataha.
