SHILLONG: ‘El Nino’ ba ong·rongbewalna bate mikkarang komibate wanaba gnang ine mikraksamsoatanirangko man·ahani gimin Sukrobar salo, a·dokni Chief Minister Conrad K Sangma-ni dilanichi, dingtang dingtang a·jani official-rangna workshop-ko ong·atangaha aro ia workshop-o a·dokni Chief Minister aganprakengon, ong·ronggijagipa obostarangko chagrongna nangani somoirangona bakrime kamrangko ka·sochina agan-ku·pattianirangko on·angaha.
Ia obostana mikraksamsona nangengani gimin janapangengon, batanggimin June jao Meghalaya a·doko 80 percent-na baten mikkarang komie waaniko nikna man·aha ine Chief Minister parakataha.
Official-rangni agansamsoanirango ka·donganirang donggenchimoba pangnan tarisamsoanirang dongna nanga ineba ua aganaha.
Ding·a sin·a batroroaniara mikkangchina ra·biani ong·jaha indiba ian da·o chagrongna nangenggipa obostaan ong·engaha ine janapatengon, agansamsoanirango dingtanganirang ong·na man·genchimoba tarisamsoaniode senge dongchana man·jawa ine Chief Minister aganaha.
Neng·nikanirangko chagrongna nangani somoirango bang·e nangchakeaniko man·jana gita dingtang dingtang department, gittimrang aro institute-rangni gisepo nangrime kamrangko ka·samsochina Chief Minister didiangaha.
U·iatanirango aro joltango ong·enga obostarango pangchake nanga gita ja·kurangko de·chinaba ua dingtang dingtang a·jani official-rangko didiangaha.
Gama ge·ani kamrango Prime Minister-ni mittelpilaniko man·chape a·songni upattirangkoba man·aha ine janapatengon, a·doko ong·telaigipa a·salrangchi gama ge·aniko tang·doatkuchina gita Chief Minister ku·pattiangaha.
Chirangko ripinge rakkina man·na gita dingtang dingtang cholrang, jekai check dam-rangko rikani, chiring chibisikrangko tangatpilani aro uandakgipa cholrangko ra·gatchinaba Chief Minister ku·pattiangaha.
Sorkarini chu·sokanikode scheme-rangchi ong·ja indiba manderangni janggi tanganio dingtanganiko ra·baanichisa tona nanga ineba Sangma aganaha.
Ia kamo seoka man·gipa dilgiparang, jatko dilgiparang, self help group-rang aro chatro chatrirangkoba bakrime kam ka·china gita Chief Minister didiangaha.
Ia workshop-ko ong·atanio dal·dalgipa sorkari official-rang, deputy commissioner-rang, agriculture official-rang aro dingtang dingtang official-rangba bak ra·angtokaha.
