Party candidate-ko parakna somoirang bang·en dongkuenga ine a·kanga
SHILLONG: Da·o adita jarangni gisepo ong·atna sienggipa Shillong parliamentary by-election-o Bharatiya Janata Party (BJP)-ni dilgipa aro Pynthorumkhrah constituency-ni MLA AL Hek an·tangde susajawa ine parakatenba, BJP-ni candidate-na South Shillong-ni MLA aro a·dokni Cabinet Minister Sanbor Shullai-ko minge on·angskaaha.
Hek-ni kobor ra·timgiparangna parakatani gitade, ia by-election-o susachina gita BJP-ni dilgiparang, uko didiahachim indiba uo dingtang kamrang dongani gimin ua election-o susana gita jechakaha.
“A·bachengode angkon Shillong Lok Sabha by-election-o susachina gita party-ni dilgiparang aganahachim indiba da·o dipet ango dingtang kamrang dongani gimin anga susana man·jawa ine aganchakaha. Uni gimin anga an·tangde ia by-election-o susajawa aro party-ni candidate-ko seokanide da·o dilgiparangni jakosa ong·a,” ine Hek aganaha.
Shillong Lok Sabha by-election-na ua, South Shillong-ni BJP MLA Sanbor Shullai-ko candidate dake seokchina ma·mongo BJP-ni dilgiparangna u·iataha ineba Hek parakataha.
“Shullai-ni bimingko anga an·tangde minge on·ataha aro da·o candidate-ko seokanide ma·mongni dilgiparangosa pangchakaignok. Jeko candidate-na minggenchimoba chinga dilgiparangni seokako ra·chakaigen aro ia by-election-o bilaken susaanggen,” ine BJP MLA Hek aganaha.
Shillong Lok Sabha by-election-na BJP-ni candidate-ko parakningjaengani gimin sing·anina aganchakaniko on·angengon, election-na party-o chu·onga gita somoirang dongkuenga ine Hek parakataha.
“November 20 tarikmangonade chinga somoirang dongkuengani gimin party-ni candidate-ko parakna bang·en somoirang dongkuenga. By-election-ko ong·atna da·o jabonga jadokmang dongkuengani gimin ian ja·manchakengaha ong·ja. By-election-na tarisamsonade jagittam jabrian chu·ongaia,” ine ua aganaha.
Re·anggipa February-ni 19 tariko, Shillong-ni Lok Sabha MP Ricky Andrew J Syngkon-ni tanggitik saaniko man·e siangani ja·man da·o Shillong Parliamentary Constituency-ni by-election-ko ong·atna nangengachim ine nikna man·a.
